1. மேல் வீட்டில் மத்தளமாம்;
கீழ்வீட்டில் நாட்டியமாம்...! - எவைகளென்று தெரிகிறதா?

2. ஆடச் சொல்லிச் சட்டை போடுவார்;
ஆடும் முன்பே கழற்றி விடுவார். - யாரென்று தெரிகிறதா?
3. அப்பா வீட்டுக் குதிரை,
அற்புதமான குதிரை.
காதைப் பிடித்தால்,
வாயால் கடிக்கும். - எதுவென்று தெரிகிறதா?

4. கழனியிலே கதிர் விளையும்;
கையால் பறிக்க மாட்டேன்;
கத்தரியால் வெட்டிடுவேன். - என்னவென்று தெரிகிறதா?

5. பாட்டுப் பாடி வருவார்;
‘பட்’டென்று அடித்தால் சாவார். - யாரென்று தெரிகிறதா?

6. வெள்ளை வீட்டுக்கு இரண்டு கூரை.
கதவும் இல்லை; காவலும் இல்லை. - என்னவென்று தெரிகிறதா?

7. ஆயிரம் பேர் அணிவகுப்பர்;
ஆனாலும் துளசி கிளம்பாது. - எவையென்று தெரிகிறதா?

8. ஒரு மரத்திற்குப் பன்னிரண்டு கிளை.
ஒரு கிளைக்கு நாலு கூடு.
ஒரு கூட்டுக்கு ஏழு முட்டை.
ஏழு முட்டையில் ஒரு முட்டை பொன் முட்டை. - எவைகளென்று தெரிகிறதா?

9. மலையிலிருந்து விழுகிறவனுக்கு வாயில்லை;
கதறுவான். காலில்லை;
ஓடுவான். - யாரென்று தெரிகிறதா?

10. வீடு வாசல் காப்பவன்;
விசுவாசமாய் இருப்பவன்;
கடிக்க மாட்டான்;
குலைக்க மாட்டான்;
கதவை ஒட்டிக் கிடப்பவன். - யாரென்று தெரிகிறதா?

1. இடி, மழை

2. பம்பரம்

3. கத்தரிக்கோல்

4. தலைமயிர்

5. கொசு

6. முட்டை

7. எறும்புக் கூட்டம்

8. வருஷம், மாதம், வாரம், கிழமை, விடுமுறை நாளான ஞாயிறு

9. அருவி

10. பூட்டு

இது முத்துக்கமலம் இணைய இதழின் படைப்பு.