சமூகம் என்பது மிகப்பெரிய மக்கள் குழுவாகும். இந்த மனிதக் குழுவானது தனக்கு வேண்டியவற்றை நிறைவு செய்து தானும் வளரும் ஆற்றல் உடையது. மேலும் தனக்கென்று ஒரு குறிப்பிட்ட பண்பாட்டினையும் கொண்டது. இலை தழைகளை உடுத்தி வாழ்ந்த மனித சமுதாயத்தின் கடந்த காலப் பாதைகளையும் இன்று அவன் கண்டிருக்கும் உச்சங்களையும் எண்ணினால் வியப்பில் நம் விழி விரிவது தவிர்க்க இயலாதது எனலாம். மானிடச் சமுதாயத்தின் பல்வேறு படிநிலை வளர்ச்சிகளில் அவனது மொழியின் வளர்ச்சியும் இன்றியமையாததாக உள்ளது. ஓலைச்சுவடிகளை உற்று நோக்கி இலக்கியம் கற்று வந்த நம் தமிழினம் இன்று கணினியின் வழியே உலக இலக்கியங்களை உற்று நோக்கி வருகிறது. தமிழனத்தின் பரந்து பட்ட உலகப் பார்வைக்குப் பெருந்தொண்டு புரிந்த கணினித்தமிழின் வரலாற்றையும், அதன் இன்றைய வளர்ச்சிப் போக்கினையும் விளக்குவதே இக்கட்டுரையின் நோக்கமாகும்.

‘ஆல்போல் தழைத்து அருகுபோல் வேரூன்றி
மூங்கில் போல் முசியாமல் வாழும்”

மொழி நம் தமிழ்மொழியாகும்.

எண்ணிலடங்கா இலக்கிய, இலக்கண வளங்களைக் கொண்ட நம் மொழியின் எழுத்தாக்கங்களும், இலக்கியங்களும் முற்காலத்தில் ஓலைச்சுவடிகளிலேயே பாதுகாக்கப்பட்டன. தனிமனிதனின் வளர்ச்சிக்கும் பண்பாட்டு உயர்வுக்கும் தேவையான இலக்கியங்களைப் படைப்பதோடு அதனைப் பாதுகாப்பதும் பெரும் பணியாய் இருந்தது. ஏனெனில் ஓலைச்சுவடிகள் வெகுநாட்கள் உழைக்காது. ஏராளமான ஆயுர்வேத முறையில் பாதுகாப்பு செய்யப்படினும் ஓலைச்சுவடிகள் கால வெள்ளத்தாலும், கரையான்களாலும் அழிக்கப்பட்டு அழிந்து போயின. அச்சு இயந்திரத்தின் வருகைக்குப் பின்னர் தமிழ் இலக்கியங்கள் மெல்ல மெல்ல அச்சு வடிவம் பெற்று பாதுகாக்கப்படலாயின. அதன் அடுத்த கட்ட வளர்ச்சி நிலையாக, இன்றைய நவீன உலகில் தமிழின் பெரும்பாலான நூல்கள் கணினியில் பதிவேற்றம் செய்யப்பட்டு அதன் வாயிலாக நமது இல்லம் தேடி வந்து நமது உள்ளங்களை நிறைவிக்கிறது.

‘பரிணாம வளர்ச்சியின் தாகத்தைத்
தணிக்க வந்த தங்கரதமே
உன்னைத் துறந்த வாழ்க்கையில்
மனிதர்கள் ஒரு நடைப்பிணம்”

கணினி குறித்த இந்த புதுக்கவிதையானது, மனித சமுதாயத்தில் கணினியின் முக்கியத்துவத்தைத் தெளிவுற நமக்கு உணர்த்துகிறது. கணினியின் தோற்றம் என்பது ஏறக்குறைய ஐம்பதாண்டுகளுக்கு முன்புதான் எனினும் அதன் வளர்ச்சியானது அசுர வேகத்தில் சென்று கொண்டிருக்கிறது. மனித வரலாற்றில் கனிணியின் வருகை ஒரு திருப்புமுனை என்றே கூறலாம். மனிதனின் பிற கண்டுபிடிப்புகள் செய்யாத பல சாதனைகளை இக்கனிணியானது செய்து வருகிறது. இது ஒரு மின்னணுயுகம் என்று நாம் பொதுவாகக் குறிப்பிட்டாலும், இந்தக் காலத்தைச் சிறப்பாக ‘கணிப்பொறியுகம்” என்றும் அழைக்கலாம்.



இன்று மனித வாழ்க்கையில் கணினி பயன்படுத்தாத துறையே இல்லை என்னும் அளவிற்கு மனித வாழ்க்கையைக் கணினி கட்டிப்போட்டுள்ளது என்றே கூற வேண்டும். அதற்கு முக்கியக் காரணம் உலக அளவில் இணைக்கப்பட்ட கணினிகளின் அமைப்பான இணையம் ஆகும். முதன் முதலில் தமிழை இணையத்தில் ஏற்றம் பெறச் செய்தவர் சிங்கப்பூரைச் சேர்ந்த நா. கோவிந்தசாமி ஆவார்.

‘சென்றிடுவீர் எட்டுத்திக்கும் - கலைச்
செல்வங்கள் யாவும் கொணர்ந்திங்கு சேர்ப்பீர்
தேமதுரத் தமிழோசை
உலகமெலாம் பரவும் வகை செய்தல் வேண்டும்”

என்ற பாரதியின் கனவானது பரிபூரணமாக நிறைவேறும் வகையில் இணையத்தின் வழி தமிழ் மொழி அடைந்த பயனானது பலப்பல. நம் தாய்மொழியாம் தமிழ் மொழி நம் நாட்டைத் தாண்டி சில நாடுகளில் பேச்சு மொழியாகவும், சில நாடுகளில் ஆட்சி மொழியாகவும் உள்ளமை இங்கு நோக்கத்தக்கது. அங்கு வாழும் மக்கள் தம் தாய் மொழியினையும், தமது பண்பாட்டினையும் நிலை நிறுத்திக் கொள்ள வேண்டிய கட்டாயத்தில் உள்ளனர்.

”மக்களின் சிந்தனைத் திறன்இ அறிவின் முதிர்ச்சி, செயற்பாட்டுத் திறன் அனைத்திற்கும் அடிப்படையாகத் தாய் மொழி அமைகிறது” என்ற டேவிட் பிரபாகர் அவர்களின் கூற்றானது இங்கு நோக்கத்தக்கது.

உலகெங்கும் வாழும் தமிழர்களும், அவர்களது சந்ததியினரும், தமிழார்வலர்களும் பயன்பெறும் வகையில் உலகம் முழுவதிலும் உள்ள பல்கலைக்கழகங்கள், புத்தகக் கடைகள், நூலகங்கள் இவற்றில் உள்ள கலைக் களஞ்சியங்கள், அகராதிகள், நிகண்டுகள் போன்றவற்றை இணையத்தில் இலவசமாகப் பதிவிறக்கம் செய்து கொள்ளலாம். மேலும் தமிழ் இணையப் பல்கலைக்கழகம் தமிழ்க் கல்வியை ஆரம்பப் படிப்பு முதல் ஆராய்ச்சிப் படிப்பு வரை கணினியின் வழி வழங்கத் திட்டமிட்டு அதற்கான முயற்சியினையும் மேற்கொண்டு வருகிறது. இதன் வழி தமிழ்மொழியின் வளர்ச்சியானது, காலந்தோறும் உறுதி செய்யப்படுகிறது எனில் அது மிகையன்று.

கணினியில் தமிழ் தோன்றியது 1980 காலப்பகுதியிலேயே ஆகும். அதன் பிற்பகுதியில்தான் கணினியில் தமிழ் எழுத்துருக்கள் உருவாக்கப்பட்டன. தற்போது நூற்றுக்கும் மேற்பட்ட தமிழ் எழுத்துருக்கள் உள்ளன. இன்றையச் சூழலில் கணினியில் ஆங்கிலமொழிக்கு அடுத்த நிலையில் கோலோச்சும் மொழியாக நம் தமிழ்மொழி உள்ளது.

‘ஆயிரத்து தொள்ளாயிரத்து எண்பதுகளில் திருவள்ளுவர் எனும் கணினி உருவாக்கப்பட்டது. பின்னர் 48 சொற்றொகுப்பு பெங்களூரைச் சேர்ந்த மென்பொறியாளர் ஆய்வுக்குழு (Software Research Committee) எனும் நிறுவனம் உருவாக்கி தமிழ்க் கணினியில் அறிமுகப்படுத்தியது”

பல்வேறு அறிவியலாளrகளின் தளராத முயற்சியில் தமிழ்க் கணினியானது குறுகிய காலத்தில் செம்மையுற்று வருகிறது. கணினிப் பயன்பாட்டாளrகளாகத் தமிழர்கள் அனைவரும் பயன்பெற இதழியல் துறையானது, கணினித் தமிழ் குறித்த பல்வேறு விழிப்புணர்வு கட்டுரைகளை வெளியிட்டு வருகிறது.

உலகில் எந்தவொரு அமைப்பானாலும், மக்கள் மனதில் நிலைத்து நின்று தனது செல்வாக்கை நிலை நிறுத்த அத்துறைச் சார்ந்த மாநாடுகள் மற்றும் கருத்தரங்குகள் நடத்துவது அவசியமாகின்றது. அந்த வகையில் ‘தமிழும் கணிப்பொறியும்” என்ற தலைப்பில் முதல் முதலில் கணினித் தமிழக் கருத்தரங்கம் 1994-ஆம் ஆண்டு டிசம்பர் மாதம் 5 மற்றும் 6ஆம் நாட்களில் நடைபெற்றது. முதல் உலகத் தமிழ் இணைய மாநாடு 1997ஆம் ஆண்டு மே 17,18 ஆம் தேதிகளில் நடைபெற்றது. அதனைத் தொடர்ந்து பல்வேறு மாநாடுகளும், கருத்தரங்குகளும் வெற்றிகரமாக நடத்தப்பட்டுக் கணினித் தமிழின் இன்றைய அசுர வளர்ச்சிக்கு துணை நின்றன. இத்தகைய கணினித் தமிழின் வளர்ச்சியானது தமிழ்மொழியின் எதிர்கால வளர்ச்சிக்கான இன்றைய வித்து எனலாம்.

இன்றைய அவசர உலகில் மண்ணிலிருந்து விண்ணுலகு வரை அனைத்து தகவல்களையும் உள்ளடக்கியது இணையமாகும். இணையத்தில் நுழைந்த முதல் இந்திய மொழி தமிழ் மொழியே ஆகும் (தினமணி, 07.02.1999). அதன் பயன்பாட்டிற்கு வானமே எல்லையாகக் கூறலாம். நம் தாய்மொழியாம் தமிழ்மொழியை தரணி முழுவதும் பரப்ப இணையமானது பல்வேறு வகைகளில் உதவி வருகிறது.

‘வடவேங்கடம் தென்குமரி ஆயிடைத்
தமிழ் கூறும் நல்லுலகம்”

என்ற தொல்காப்பிய பாயிரத்தில் கூறப்பட்ட எல்லைகளைக் கடந்து உலகு தழுவி தமிழ் மக்கள் வாழ்கின்றனர். உலகம் முமுவதும் பரந்து கிடக்கும் தமிழ் மக்களின் உறவுகளை ஒன்றிணைப்பதே விஞ்ஞான வளர்ச்சியின் விளைவால் தோன்றிய கணிப்பொறியும், இணையமும் தான். இன்று இணையத்தில் உள்ள மின் இதழ்களும், அச்சு இதழ்களும் தமிழை உலகிற்கு எடுத்துக்காட்டி தமிழின் அடையாளம் மாறாமல் காத்து வருகின்றன. மேலும் உலகளாவிய நிலையில் தமிழ்மக்கள் தாய்மொழியோடும், தங்களது பண்பாட்டு விழுமியங்களோடும் இணைந்திருக்கவும், தமிழ்மொழியின் செவ்வியல் இலக்கியங்கள் முதல் இக்கால இலக்கியங்கள் வரை அனைத்து நூல்களையும் அறிந்து கொள்ளவும் இணையத்தின் பயன்பாடு இன்றியமையாததாக உள்ளது.

நம் வாழ்க்கையை வசதிப்படுத்திக் கொண்டிருக்கின்ற அறிவியல் மற்றும் தொழில்நுட்பங்கள் பலப்பல. நாம் பேசும் மொழியின் வாழ்விலும், வளர்ச்சியிலும் அவற்றின் தாக்கமுண்டு. ஊர் ஊராகச் சென்று ஓலைச் சுவடிகளைச் சேகரித்துத் தமிழ் இலக்கியத்தை அழியாமல் பாதுகாத்த உ. வே. சாமிநாத அய்யரின் கனவை நிறைவேற்றும் வகையில் உலகெங்கும் வாழும் தமிழர்கள் ஆயிரக்கணக்கான இணையதளங்களைத் தமிழ் மொழிக்காக உருவாக்கி, நம் இலக்கியங்களை உலகெங்கும் உலாவரச் செய்துள்ளனர். மேலும் கணினியில் பதிவேற்றம் செய்யப்பட்ட இலக்கியங்களைப் பார்வையிடுவதற்குத் தமிழ் மொழியிலான தேடியந்திர மென்பொருளும் உருவாக்கப்பட்டுச் செயலாக்கத்தில் உள்ளது. இவை மட்டுமல்லாமல் மேலை நாடுகளில் பணிபுரியும் தமிழர்கள் பலரின் தணியாத முயற்சியால் இணையத்தில் தமிழானது விரைவாகப் பரவி வருவது பாரட்டுதலுக்குரியது.

‘விழுதுகள் காக்கப்பட்ட வேண்டுமானால் தமிழர்கள் தமிழ்மொழியோடு தொடர்பறாது வாழ வேண்டும். தமிழ் இலக்கியத்தோடும் தமிழ் கலைகளோடும். உறவுற்றதாக அவர்கள் வாழ்வு அமைய வேண்டும்” என்ற வா. செ. குழந்தைசாமி அவர்களின் கூற்றானது இன்று மெய்ப்பித்து வருகிறது என்பது மிகையன்று. மேலும், தனிமரம் தோப்பாகாது என்னும் முதுமொழிக்கேற்ப கணினியில் தமிழ் வளர்ச்சிக்குப் பாடுபட்டு வரும் அனைத்துப் பிரிவினரின் ஒன்றிணைந்த செயல்பாட்டிற்காகத்தான் உலகத் தமிழர்கள் காத்திருக்கிறார்கள் என்பது நிதர்சனமாகும்.

ஆதியும் அந்தமுமாக கணினியானது மாறிவிட்ட இந்தக் காலக் கட்டத்தில் கணினியிலும், இணையத்திலும் ஏற்படும் பலவித வளர்ச்சிகளுக்கு இணையாகத் தமிழறிஞர்களின் ஆர்வமும், தமிழமைப்புகளின் முயற்சியும், தமிழ் மென்பொருள் தயாரிப்பாளர்களின் செயல்பாடும், அதிகரிக்க வேண்டும். ஏனெனில் கால மாறுதல்களுக்கேற்ப கணினித் தமிழின் வளர்ச்சியைச் செம்மைப்படுத்தி, துரிதப்படுத்த வேண்டிய கட்டாயத்தில் நாம் உள்ளோம். மாற்றம் ஒன்றே மாறாதது. மொழி வளர்ச்சியில் பல்வேறு நிலைகளைக் கடந்த நாம், இன்றைய கணினியுகத்தில் கணிப்பொறி நுணுக்கம் அறிந்த அறிஞர்கள் மற்றும் தமிழறிவு மிகுந்த அறிஞர்களின் ஒன்றிணைந்த செயல்பாட்டின் வழி தமிழின் செயலாண்மையை உலக அரங்கிற்கு எடுத்துச் செல்ல வேண்டும். அதன் மூலம் தமிழ் இலக்கணங்கள், இலக்கியங்கள், சமயம், ஆராய்ச்சி, திறனாய்வு நூல்கள், கட்டுரைகள் என அனைத்தும் கனிணியில் இடம் பெறச் செய்ய வேண்டும். மேலும் உலகத்தமிழ் இணையக் கருத்தரங்க மாநாடுகள் ஒவ்வொரு ஆண்டும் நடத்தப்பட வேண்டும். தமிழக அரசும் இத்தகைய முயற்சிகளை அனைத்து நிலைகளிலும் ஊக்குவிக்க வேண்டும். இம் முயற்சியானது வெறுமனே தமிழர்களின் தமிழ் வாசிப்பிற்காக மட்டுமல்ல, தமிழர்களின் கலாச்சாரமும், பண்பாடும், தரணியெங்கும் புகழ் பரப்ப வேண்டும் என்ற உயரிய நோக்கத்திற்காகத்தான். அப்போது தான் நமது வீடும் சிறக்கும், அதன் வழி நாடும் நலம்பெறும்.

1. இணையத் தமிழ், அனைத்திந்திய அறிவியல் தமிழ்க் கழகத்தின் கருத்தரங்க நூல், தஞ்சாவூர்- 5 (2003)

2. முனைவர் வை. சு. க. கண்ணன், மின் தமிழ், தாணி பதிப்பகம், காரைக்குடி - 1 (2003)

3. வா. மு. சே. ஆண்டவர், கணினியில் தமிழ், சேதுச்செல்வி பதிப்பகம், சென்னை- 93 (2001)

4. துரை. மணிகண்டன், இணையமும் தமிழும், நல்நிலம் பதிப்பகம், சென்னை-17 (2008)

*****

இது முத்துக்கமலம் இணைய இதழின் படைப்பு.