திருமாலை முழு முதற் கடவுளாகக் கொண்டு போற்றப்படும் சமயம் வைணவ சமயம். திருமாலின் பக்தர்களை ஆழ்வார்கள் என்று சிறப்பு பெயரிட்டு அழைப்பார்கள். இவர்கள் பன்னிருவர். இவர்கள் பாடிய பாசுரங்கள் நாலாயிரத் திவ்விய பிரபந்தமாக உருப்பெற்றுள்ளது. திருமாலை முல்லை நிலக் கடவுளாகச் சிறப்பித்துச் சொல்லுவர். இதனை,

“மாயோன் மேய காடுறை உலகமும்”

என்ற தொல் காப்பியரின் நூற்பாவால் அறியலாம்.

சங்க இலக்கியங்களில் ஒன்றான பரிபாடல் திருமாலின் சிறப்புகளை எடுத்தியம்புகின்றது. மேலும், திருமாலின் சிறப்புகளைப் பற்றியும், திருமாலை வழிபடும் முறைகள் பற்றியும் சிலப்பதிகாரம் குறிப்பிடுகின்றது. இளங்கோவடிகள் “மாங்காட்டு மறையனின்” வாயிலாக இதனை உறுதிப்படுத்துவார். இதனை,

“சிலப்பதிகாரம் ஆச்சியர் குரவையில் இளங்கோவடிகள் கண்ணனையும், இராமனையும் பாடி உருகுவார். அதனால் திருமாலின் வழிபாடு தமிழரின் தொடக்கக் காலத்திலேயே இருந்துள்ளது. மேலும். அது பக்தி என்பதை இயக்கக்காலத்தில் வளர்ந்துள்ளது” என்று சுப்பிரமணியம் தனது இலக்கிய வரலாற்றில் கூறுவதிலிருந்து அறியலாம்.

ஆழ்வார்களில் கருடனின் அவதாரமாக இருப்பவர் பெரியாழ்வார் ஆவார். அவர் பிரம்மாவால் இவ்வுலகிற்கு அனுப்பி வைக்கப்பட்ட மாபெரும் சக்தி. அத்தகைய பக்தரின் பாசுரங்களின் வழி திருமாலின் இறை வழிபாட்டினை ஆராய்ந்து அறிவது இவ்வாய்வுக் கட்டுரையின் நோக்கமாகும்.

ஆழ்வார்கள் என்பது திருமாலின் அடியார்கள். இவர்கள் பக்தியில் ஆழ்ந்தவர்கள் என்று கழக அகராதி குறிப்பிடும். எல்லாவற்றிலும் பெரியவனானத் திருமாலைத் தனக்குள் வைத்ததனால் இவரைப் பெரியாழ்வார் என்று கூறுவது மிகவும் பொருத்;தமானது என்பதை அறியலாம்.

திருமாலைத் தன் உள்ளத்தில் வைத்து நாள்தோறும் பாடியதால் அத்தகைய பெயரை அவர் பெற்று இருக்கலாம். இதனை,

‘எம் பெருமானுடைய திவ்ய மங்களவிக்ரகம் நிலைத்திருக்க வேண்டுமென்று பல்லாண்டு பாடியதால் இவர் பெரியாழ்வார் என்று பெயர் பெற்றார் என்று உபதேச ரத்தின மாலை விவரிக்கிறது” என்று கல்விக்கடல் எஸ். கே. இராமராஜன் ‘ஆழ்வார்களும் கம்பனும்’ என்ற நுலில் குறிப்பிடுவதிலிருந்து அறியலாம்.

உலகம் ஐம்பொறியாளாகிய வேடர்களால் துன்புற்றுக் கொண்டிருந்தது. இதனை மேல் உலகத்திலிருந்து ஏழுலகையும் ஆள்பவனான பரமன் கவனித்தான். அவன் பொய்யான தன்மை படைத்த அற்பப் பாம்புகளாகிய மனிதர்களை அழித்து, உலகைத் திருத்த கருடனைப் பெரியாழ்வாராக அவதரிக்குமாறு செய்தார். இதனை,

ஏழுலகாள்வான் பொய் திறத்தார் புலைச்சற்பம் பொடியாகக் கருடனைத்தன் என்ற சித்திரத்தால் பெரியாழ்வாராய் உலகைத் திருத்தென்றான் ஆழ்வார் பாசுரங்களின் வழி அறியலாம்.

இவர் பாண்டிய நாட்டில் ஸ்ரீவில்லிபுத்தூரில் பிறந்தவர். இவரை விஷ்ணு சித்தர், பட்டர்பிரான், புதுமை மன்னர், வேயர் குலத்துத் தலைவராய் திகழந்த சிற்றரசர் என்றும் கூறுவர்.

இவரது காலம் ஸ்ரீமாறன் ஸ்ரீவல்லவன் என்ற பாண்டியன் காலம் என்பதைக் கோபிநாத்ராவ் அவர்கள் கூறியதை ச. வே. சுப்பிரமணியம் தமிழ் இலக்கிய வரலாற்றில் குறிப்பிடுவதிலிருந்து அறியலாம். “பன்னிரு ஆழ்வார்களும் கி.பி. 500 முதல் கி.பி. 800 ஆண்டு வரையிலான கால அளவில் வாழ்ந்தவர்கள் என ஆய்வாளர்கள் சிலர் கருதுவர்” என்று கே. கே. பிள்ளை தனது ‘தமிழக வரலாற்று மக்களும் பண்பாடும்’ என்ற நூலில் குறிப்பிடுவதிலிருந்து அறியலாம்.

இவர் ஸ்ரீ வைணவ அந்தணர் குலத்தைச் சார்ந்தவர் நாலாயிரத்துத் திவ்வியப் பிரபந்தத்தின் முதலாயிரத்தில் இவரது பாசுரங்கள் இடம் பெறுகின்றன.

பெரியாழ்வார் இறைவனின் மீது கொண்ட அன்பைத் தன் பாசுரங்களில் படம் பிடித்து காட்டுகின்றார். அப்பாசுரங்கள் பக்தி சுவை நனி சொட்ட சொட்ட இயற்றப்பட்டதாகும். இதனை,

“ஓங்காரத்திற்கு இணையாக திருப்பல்லாண்டைத்
திருவாய் மலர்ந்தவர் பெரியாழ்வார்”

என்ற கூற்றினால் அறியலாம்.

திருமாலின் அவதாரமான கண்ணனைக் குழந்தையாகப் பாவித்து பாசுரங்களைப் பாடியுள்ளார். மேலும், பெரியாழ்வாரின் பாசுரங்கள் அவரின் அனுபவத்தையும், பக்தி நெறியையும், திருமாலின் சிறப்பையும் தெளிவுபடுத்தியுள்ளன. இதனை,

“பெரியாழ்வாரின் பாடல்களில் முதிர்ந்த அனுபவமும், மிகுந்த
எளிமையும், தூய அமைதியும், சோகம்
கலந்த அன்பு முதிர்ச்சியும் காணப்படுகிறது”

என்று ‘தமிழ் இலக்கிய வரலாறு’ நூலில் ச. வே. சுப்பிரமணியன் கூறும் கூற்றினால் அறியலாம்.

பெரியாழ்வார் கண்ணனின் திருவுருவத்தைக் கண்ணால் கண்டு, மனத்தினால் போற்றி வழிபட்டார்.

செந்தாமரைத் திருவடிகளில் மோதிரங்களும், பாதச் சதங்கை ஒலியும், திருவரையில் சாத்தியுள்ள பொன் அரை நாணும், பொன்மனிக் கோவையும், கை விரல்களில் ஆழிகளும், மணிக்கட்டில் சிறுபவள வடமும், திருமார்பில் ஐம்படைத் தாலியும், தோள்களில் வளைகளும், காதுவணிகளும், மகரக்குழைகளும், செவிமடல் மேல் வாளிகளும், நெற்றியில் சுட்டியும், ஒளி வீசும்படி எங்கள் குடியினைக் காப்பவனே! என்று பாடுகின்றார். இதனை,

“செங்கமலக் கழலிற் சிற்றதழ் போல் விரவிற்
சேர் திகழ் ஆழிகளும் கிண்கிணியும் அரையிற்
தங்கிய பொன்வடமும் தாள் நன் மாதுளையின்
பூவொடு பொன்மணியும் மோதிரமும் கிறியும்
மங்கல ஐம்படையும் தோள் வளையும் குழையும்
மகரமும் வாளிகளும் சுட்டியும் ஒத்து இலக”

என்ற பாடல் வரிகள் உணர்த்துகின்றன. கண்ணன் அணிந்துள்ள ஒவ்வொரு அணிகலன்களையும் கூறித் தம் மனதுள் அவனை எண்ணி வழிபடுகிறார்.

பெரியாழ்வார் “இசைக்கு மயங்காதவர் எவருமில்லை” என்பதற்கிணங்கக் கண்ணன் மீது இசை பாடி மகிழ்கிறார்.

செண்பக, மல்லிகை, இருவாட்சி போன்ற மலர்களைக் கண்ணணுக்குச் சூட்ட வேண்டுமென்று, யசோதை சொல்லியவற்றை எல்லாம் பெரியாழ்வார் இசையுடன் சொல்கிறார்.

“செண்பக மல்லிகையோட செங்கழு நீர்; இருவாட்சி
எண் பகர் பூவும் கொணர்ந்தேன் இன்று இவை சூட்டவா”

இதனை மேலும் கண்ணன் ஆழிக்கையுடைய குழந்தையாகி யசோதையின் முதுகை அணைத்தைப் பாசமாக்கிப் பாடினார்.

“ஆய்ச்சி அன்று ஆழிப்பிரான் புறம் புல்கிய
வேய்த் தடந் தோளி விட்டு சித்தன் மகிழ்நது
ஈத்த தமிழ் ஈரைந்தும் வல்லவர்
வாய்த்த நன் மக்களைப் பெற்று மகிழ்வரே”

தமிழ்ப் பாசுரங்களை இசைக்க வல்லவர்கள், எம்பெருமானுக்கு மங்களம் பாடி இசைக்க நன் மக்களைப் பெற்று மகிழ்வர் என்று கூறுகிறார்.

பெரியாழ்வார் கண்டம் என்னும் திருப்பதியில் பதினொரு பாசுரங்கள் பாடியுள்ளார்.

அகார, உகார, மகார, ‘ஓம்’கார மந்திரம் மூன்று சொல்லால் மூன்று பொருளுக்கு வாசகமாயிருக்கும். அதேபோல், மூன்று எழுத்தாகிய இருப்பிடம் எதுவென்றால், நறுமனம் கமழும் பெரிய சோலைகளால் சூழ்ந்த கங்கையின் கரைமேல் கண்டம் என்னும் சிறப்பான நகரமே ஆகும் என்கிறார் பெரியாழ்வார்.

“மூன்றெழுத்து தனை மூன்றெழுத்ததனால்
மூன்றெழுத்தாக்கி மூன்றெழுத்தை
என்று கொண்டிருப்பார்க்கு இரக்கம் நன் குடைய
எம் புருடோத்த மனிருக்கை”

கண்டம் என்னும் திருப்பதியை “தேவ பிரயாகை” என்று ‘வைஷ்ணவ திவ்ய தேச யாத்திரை’ எனும் நூல் கூறுகிறது.

மதுரையிலிருந்து காரைக்குடி செல்லும் வழியிலுள்ள திருப்பத்தூரிலிருந்து எட்டு கிலோ மீட்டர் தூரத்தில் உள்ளது.

“காசின் வாய்க்கரம் விற்கிலும் கர
வாது மாற்றிலி சோறிட்டு
தேசவர்த்தை படைக்கும் வண்கைமி
னார்கள் வாழ்திருக் கோட்டியூர்...”

இத்திருத்தலத்தில் பெரியாழ்வார், திருமங்கையாழ்வார், பூதத்தாழ்வார், பேயாழ்வார், திருமமிழிசையாழ்வார் ஆகியோர் பாசுரங்கள் பாடியுள்ளனர்.

* பெரியாழ்வார் பல திருத்தலங்களுக்குச் சென்று எம்பெருமானைச் சேவித்துப் பாடியுள்ளார் என்பதை இக்கட்டுரை தெளிவுபடுத்துகிறது.

* இவர் பாடிய தாலாட்டுகள் குழந்தை இலக்கியத்திற்கான கூறுகளை உள்ளடக்கிக் காணப்படுகிறது.

* ஆழ்வார்களிளே, எம்பெருமானின் பேரன்புக்குப் பாத்திரமானவர் பெரியாழ்வார் என்பது ஆய்வில் நிறுவப்பட்டுள்ளது.

*****

இது முத்துக்கமலம் இணைய இதழின் படைப்பு.