கோடைக் காலத்திற்கான ஒரு சிறந்த பானம் மோர். பாலில் இருந்து வெண்ணையைப் பிரித்தெடுத்த பின்னர், மீதம் உள்ள நீரை மோர் என்கிறோம். தயிரில் நீர் கலந்து கரைத்தும் மோர் உருவாக்கப்படுகிறது. நம் உடலுக்கு எந்தவிதமான பக்க விளைவுகளையும் ஏற்படுத்தாமல், தாகத்தைத் தணித்து உடலின் நீர்ச்சத்தை தக்க வைக்கும் அருமையான பானம் மோர்.

* மோரில் உள்ள எலக்ட்ரோலைட்ஸ் உடலை நீரேற்றத்துடன் வைத்திருக்க உதவுகிறது.

* ஒரு கிளாஸ் மோருடன் உப்பு சேர்த்து, நாள்தோறும் குடித்து வர உடல் மற்றும் சரும வறட்சிப் பிரச்சனைகள் நீங்கும்.

* உண்ணும் உணவில் உள்ள கழிவுகளை அகற்றி, உணவின் சத்துக்களை முழுமையாக உடலுக்குக் கொண்டு சேர்க்கும் பணியை மோரில் உள்ள சேர்மங்கள் செய்வதால், கல்லீரலின் ஆரோக்கியம் மேம்படுகிறது.

* மோரில் இருக்கும் புரோபயோடிக்ஸ் என்ற பாக்டீரியாக்கள், உடலில் செரிமான செயல்பாட்டை மேம்படுத்த உதவுகிறது. இதனால், மலச்சிக்கல், செரிமான பிரச்சனை உள்ளவர்கள் மோர் குடிப்பது மிகவும் நல்லது.

* உடலில் சேரும் நச்சுப்பொருட்களை வெளியேற்றும் பணியை மோர் சிறப்பாகச் செய்கிறது.

* மோர் கொண்டு முகத்திற்கு மசாஜ் செய்து வந்தால் சருமத்தில் உள்ள நச்சுக்கள் நீங்கி சருமம் பொலிவுறும்.


* மாமிசம், மசாலாப் பொருட்கள் நிறைந்த கடின உணவுகளை எடுத்துக் கொள்ளும் போது, வயிற்றில் ஏற்படும் எரிச்சல் உணர்வினைக் கட்டுப்படுத்த மோருடன், இஞ்சி சேர்த்துக் குடிப்பது நல்லது.

* மாதவிடாய்க் காலங்களில் பெண்கள் எதிர்க்கொள்ளும் அதிகப்படியான இரத்தப்போக்கு பிரச்சனை, வயிற்று வலிக்கு, ஒரு கோப்பை மோரில் வெந்தயம் சேர்த்து குடித்து வந்தால் பிரச்சனைகள் நீங்கும்.

* மோரில் காணப்படும் லாக்டிக் அமில பாக்டீரியா நோய் எதிர்ப்புச் சக்திகளின் உற்பத்தியை அதிகரிக்கிறது. இது நோயெதிர்ப்பு மண்டலத்தை வலுப்படுத்தவும் உதவுகிறது.

* மோரில் இருக்கும் உயிர்ச் சத்துப் புரதங்கள் மற்றும் பாக்டீரியா எதிர்ப்புப் பண்புகள், உடல் செல்களில் உள்ள சோடியத்தின் அளவை சமநிலைப்படுத்த உதவுவதுடன் இரத்த அழுத்தத்தைச் சமநிலைப்படுத்துகிறது.

* மோரில் இருக்கும் அதிக அளவிலான புரதச்சத்து, உடலில் இருக்கும் கொழுப்பின் அளவைக் குறைக்க உதவுகிறது. ஆரோக்கியமான உடல் எடைக் குறைப்பை விரும்புவோர் மோரை அதிகம் பருகலாம்.

* ஆரோக்கியமான எலும்புகளுக்கு முக்கியமான கால்சியம் மற்றும் பிற தாதுக்கள் மோரில் அதிகம் உள்ளன. தொடர்ந்து, மோர் உட்கொள்வது ஆஸ்டியோபோரோசிஸ் போன்ற எலும்பு நோய்களைத் தடுக்க உதவுகிறது.

* மோரில் உள்ள பொட்டாசியம் உள்ளடக்கம் சோடியத்தின் தீங்கு விளைவிக்கும் விளைவுகளை எதிர்த்து, சாதாரண இரத்த அழுத்த அளவைப் பராமரிக்க உதவுகிறது. உயர் இரத்த அழுத்தம் மற்றும் தொடர்புடைய இருதய நோய்களின் அபாயத்தைக் குறைக்கிறது.

*****

இது முத்துக்கமலம் இணைய இதழின் படைப்பு.