பற்களுக்கும் புன்னகைகளுக்கும் நெருங்கிய தொடர்பு உண்டு. ஆரோக்கியமான பற்களை உடையவர்களே மனதிடத்துடன் புன்னகைக்க முடியும்.
‘புன்னகை ஒரு பெண் அணியக்கூடிய மிகச்சிறந்த ஒப்பனை’ என்கிறார் ஹாலிவுட் நடிகை மர்லின் மன்றோ. சிரிப்பு ஒருவர் சிரித்தால் அனைவரையும் தொற்றிக் கொள்ளும் அதிநன்மை வைரஸ்.
உலகப் புகழ்பெற்ற புன்னகையாளர்கள் சிலரை இங்கு பட்டியலிடுகிறேன்.
* ஜூலியா ராபர்ட்ஸ் (57 வயது ஹாலிவுட் நடிகை)
* ஈரானின் ஒன்பது வயது சிறுமி அனகிதா ஹாஸெம்ஜாதே.
* தீபிகா படுகோனே (இந்திய நடிகை)
* ராச்சல் மெக் ஆடம்ஸ் (45 வயதான கனடிய நடிகை)
* பிராட்லி கூப்பர் (அமெரிக்க நடிகர்)
* மைக்கேல் ஜாக்சன் (பாப் பாடகர் இறந்துவிட்டார்)
* டாம் க்ரூஸ் (அமெரிக்க நடிகர்)
சிரிப்பு மனிதனின் வாழ்நாளை அதிகரிக்கும், மன அழுத்தம் போக்கும், மனநிலையை இதமாக்கும், நோய் எதிர்ப்பு சக்தியைக் கூட்டும், மன வலி உள்ளிட்ட அனைத்து வலிகளும் குறையும். வருத்தமான சூழலில் கூட சிலர் சோகப் புன்னகை செய்வதைப் பார்க்கலாம்.
பற்களுக்கான குறள்கள்
* சுவை ஈறு வேர்வலி நாற்றம் ஐந்தின்
வகை அறிவான் வைத்தியன்.
* பல்வலி மாந்தர் வேதனை முகச்சுளிப்பு
சொல்மொழி காட்டிவிடும்.
- தேஜஸ் சுப்பு என்கிற கனலி
|
மனிதனின் முக அழகு, முப்பத்திரண்டு பற்கள் எனும் முத்துகளால் ஆசிர்வதிக்கப்பட்டிருக்கின்றது. பற்கள் இல்லையென்றால் முக அமைப்பு சீர் குலையும். முகத்தில் செங்குத்துச் சுருக்கங்கள் ஏற்பட்டு வயோதிகத் தோற்றம் வெளிப்படும். கீழ்தாடை தொங்கிப் போகும், உதடுகள் மெலிவாய்த் தெரியும். கடிக்கும் விதம் சொதப்பும். முகம் சுளிக்கும் தோற்றம் எதிராளியைப் பயமுறுத்தும்.
மனிதப் பற்கள் உணவைக் கடிக்க, கிழிக்க, நசுக்க என்று பல வழிகளில் உதவுகின்றன. பேசும் போது ஒலியை உருவாக்கி, பேச்சைத் தொடர்ச்சியாக உற்பத்தி செய்கின்றன.
நடிகர் ராஜ்கிரண் ‘என் ராசாவின் மனசிலே’ எனும் படத்தில் ஒரு தட்டு, ஆட்டிறைச்சி எலும்புகளை சர்வ சாதாரணமாகக் கடித்துத் துப்புவார்.
உண்ணுதல் - மெல்லுதல் - ஊட்டச்சத்து மூன்றுமே பற்களின் தாரக மந்திரம்.
ஒரு மனிதனுக்கு இரு முறை பற்கள் முளைக்கின்றன. முதல் முறை முளைத்து விழும் பற்களைப் பால் பற்கள் என்பர். இரண்டாம் முறை முளைப்பது நிரந்தரப் பற்கள். இந்தப் பற்கள் ‘ஹைடிராக்சியாபடைட்’ எனப்படும் கிரிஸ்டலைன் கால்சியம் பாஸ்பேட்டினால் ஆனவை.
பற்கள் நான்கு வகை திசுக்களால் ஆனவை.
* பல்ப் (PULP) - மிக ஆழத்தின் வேர் பகுதி.
* டென்டைன் - எனாமலுக்கு அடுத்த மிகக் கடினமான திசு இது. 70% மினரல், 30% ஆர்கானிக்.
* எனாமல் (பற்களின் வெளிப்புறப் பகுதி)
* சிமென்ட்டம் (எலும்புகளுக்கும் பற்களுக்கும் இடையேயான நங்கூரம்).
ஒரு ஆணுக்கோ அல்லது ஒரு பெண்ணுக்கோ இருக்கும் பற்களை நான்கு வகையாகப் பிரிக்கலாம்.
1. கீறல் பற்கள் அல்லது வெட்டுப்பற்கள் (INCISOR) - 8 (இதனைப் புன்னகைப் பற்கள் என்றும் கூறுவர்)
2. கோரைப்பற்கள் (CANINE) - 4
3. முன் முனைப்பற்கள் (PREMOLAR) - 8
4. கடைவாய்ப் பற்கள் (MOLAR) - 12
இருபதாவது வயதில் அறிவுப்பல் முளைக்கும்.
பண்டையக் காலத்தில், தற்போது புழக்கத்திலிருக்கும் பற்பசைகள் இருந்தனவா? மக்கள் பல் துலக்கினார்களா? அல்லது பல் துலக்காமல் திரிந்தார்களா? எனக் கேட்கலாம்.
அன்றைய மக்கள் கரித்தூள், களிமண், வாசனைப் பொருட்கள் அடங்கிய பல் துலக்கும் தூள் தயாரித்துப் பயன்படுத்தினர். பசுமை மாறா நறுமண இலைச் செடி ரோஸ்மேரி தண்டுப் பகுதியை எரித்துச் சாம்பலாக்கி பல் துலக்கினர். உப்பைப் பற்களிலும் ஈறுகளிலும் தேய்த்தனர். வெள்ளைப்பூண்டு, கிராம்பு, கருமிளகு மென்றனர். புதர்செடிபிசின், சாம்பிராணி வைத்துப் பல் தேய்த்தனர். வெற்றிலை போட்டு வாயை மணக்கச் செய்தனர்.
பழங்குடிமக்கள் அரக்கு, குங்கிலியம் வைத்துப் பற்களுக்குக் கறுப்புச் சாயம் பூசினர். 1800 ஆம் ஆண்டுகளில் பன்றி முடிகளால் ஆன பல் துலக்கி, தயாரித்துப் பயன்படுத்தப்பட்டன. எலிசபெத் ராணி காலத்தில் கறை படிந்த பற்கள் கவர்ச்சிக்குரியதாகக் கருதப்பட்டன. ரோமானியர் காலத்தில் மனிதச் சிறுநீர் வைத்துப் பற்களை வெண்மைப் படுத்தினர் என்று படித்திருக்கிறோம்.
மனிதர்களுக்கு மட்டுமல்ல விலங்குகளுக்கும் பற்கள் உண்டு. சிம்பான்ஸி, கொரில்லா, உராங்குட்டன் குரங்கு வகைகளுக்கும் மனிதரைப் போன்றேப் பல் அமைப்பு உண்டு. நாய், பூனை, கரடி பற்களுக்கும் மனிதப் பற்களுக்கும் சில ஒற்றுமைகள் உண்டு. ஆப்பிரிக்கன் ஆசியன் யானைகளுக்கு 26 பற்கள் உண்டு. இரு மேல் வெட்டுப் பற்களே, யானைகளுக்குத் தந்தமாகத் துருத்தி நிற்கின்றன. பௌத்த உருவகக் கதைகளில் ஆறு தந்தம் உள்ள சத்தன்தா ஜாடகா யானை இடம் பெற்றிருக்கிறது.
மாடுகளுக்கு 20 பால் பற்கள், 32 நிரந்தர பற்கள் இருக்கின்றன. ஆனால், கொசுக்களுக்குப் பற்களேக் கிடையாது. ஊசி போன்ற உறிஞ்சி உண்டு. அந்த உறிஞ்சி வழியாக உமிழ்நீரைச் செலுத்தி, மனித இரத்தம் உறைந்து விடாமல் பார்த்துக் கொள்கிறது. கொசுக்களில் 3600 வகைகள் உள்ளன. அட்டைப்பூச்சிகளுக்கு மூன்று தாடை உண்டு. ஒவ்வொரு தாடையிலும் 50 முதல் 60 ரம்ப பற்கள் உள்ளன. எதிராளியைக் கடிக்கும் போது, கடிக்காயத்தை திறக்க ரம்ப பற்கள் பயன்படுகின்றன. நத்தையின் நாக்கில் பற்கள் வரிசை அமைந்திருக்கும். தோட்ட நத்தைக்கு 14 ஆயிரம் பற்கள், மற்ற வகை நத்தைகளுக்கு 20, 000 பற்கள் என்று பற்களைப் பற்றி நிறையச் சொல்லிக் கொண்டேப் போகலாம்.
நீர் நத்தையின் பற்கள் டைட்டானியத்தை விட உறுதியானது. டால்பின் வயதை அதன் பற்களை வைத்துச் சொல்லிவிடலாம். மரங்களைப் போல டால்பின் பற்களுக்கும் வளையம் உண்டு. மெல்லுவதற்குப் பற்களை டால்பின் பயன்படுத்துவதில்லை. அவை இரையை முழுங்குகின்றன. ஒட்டகச்சிவிங்கிக்கு பின்பகுதி வாயில் 32 பற்கள் உள்ளன. முன்வாயில் உள்ள உதட்டையும் 20 அடி நீள நாக்கையும் இலை பறிக்கப் பயன்படுத்துகிறது. இலையைப் பின் வாய்க்குள் தள்ளி மென்று விழுங்குகிறது.
சுறா வாரத்துக்கு ஒரு பல்லை இழந்து விடும். கடற்கரையில் சர்வ சாதாரணமாகச் சுறா பற்களைக் காணலாம். விழுந்த பற்கள் அடுத்த ஒரு மணி நேரத்தில் மீண்டும் முளைத்து விடும். மனிதர்களுக்கும் மீண்டும் மீண்டும் பல் முளைக்க வைக்கும் மரபணு இருந்தது. பரிணாம வளர்ச்சியில் அந்தத் திறன் மறைந்து போய்விட்டது. முயல், அணில், எலி போன்ற கொறித்துண்ணிகளுக்கு, பற்கள் அவை சாகும் வரை வளர்ந்து கொண்டே இருக்கும்.
நீர்யானைக்கு மூன்றடி நீளமுள்ள கோரைப் பற்கள் உண்டு. அந்த பற்களால் சிறு படகைக் கடித்து துண்டித்து மூழ்கடித்து விடும். குதிரைகளுக்கு ஈறுகள் பின் வாங்கி, பற்கள் வளர்வது போல தெரியும். நார்வல் என்கிற கொம்பன் திமிங்கலத்துக்கு 8 அடி நீள கொம்பு போன்ற ஒரு பல் உண்டு. நீலத் திமிங்கலங்களுக்குப் பல் கிடையாது. அதற்குப் பதிலாக பலீன் எனும் தகட்டெலும்பு வளரும். பாம்பின் பல்லில் விசச் சுரப்பி இணைந்திருக்கும்.
வட அமெரிக்கப் பைக்கீரிகளுக்கு 50 பற்கள், ராட்சச நல்லங்குக்கு 80 - 100 பற்கள். பாட்டில் மூக்கு டால்பின்களுக்கு 72 -104 பற்கள். சுறாக்களுக்கு 3000-35000 பற்கள். கடல் நத்தைக்கு 750000 பற்கள் உண்டு.
பற்களைப் பற்றிய பல சுவையான தகவல்களைச் சொல்லிக் கொண்டே இருக்கலாம்.