கடந்த பகுதிகளில் கீறல் பற்கள் மற்றும் கோரைப்பற்கள் குறித்துப் பார்த்தோம். இந்தப் பகுதியில் முன் கடைப்பற்கள் பற்றிப் பார்க்கலாம்.
ஒரு ஆணுக்கோ ஒரு பெண்ணுக்கோ எட்டு முன் கடைப்பற்கள் இருக்கும்.
1. மேல்தாடை இடது முதல் கடைப்பல்
2. மேல்தாடை இடது இரண்டாம் கடைப்பல்
3. மேல் தாடை வலது முதல் கடைப்பல்
4. மேல் தாடை வலது இரண்டாம் கடைப்பல்
5. கீழ் தாடை இடது முதல் கடைப்பல்
6. கீழ் தாடை இடது இரண்டாம் கடைப்பல்
7. கீழ் தாடை வலது முதல் கடைப்பல்
8. கீழ்த்தாடை வலது இரண்டாம் கடைப்பல்
இந்தக் கடைப் பற்கள் வாய்க்குள் எங்கு வீற்றிருக்கும்? இவை கோரைப் பற்களுக்கும் கடைவாய்ப் பற்களுக்கும் இடையே ஒய்யாரமாக அமர்ந்திருக்கும்.
கோரைப்பற்களின் சில நிலைகளும் கடைவாய்ப் பற்களின் சில நிலைகளும் முன் கடைப்பற்களில் சேர்ந்தேக் காணப்படும்.
பற்களுக்கான குறள்கள்
* உடைந்த எயிறும் உருமாறும் என்றும்
உடையா மருத்துவம் உண்டு.
* தூய்மை உணர்வுடன் தூய்மைப்பல் லொடும்நல்
வாய்மை வளமொடும் வாழ்.
- தஞ்சாவூர் ஹரணி
|
இந்த எட்டு கடைபற்களும் உணவைக் கிழிக்க, நசுக்க, அரைக்கப் பயன்படும்.
கீழ்த்தாடைக் கடைப் பற்களின் அகலம் 7 மி.மீ. மேல்தாடைக் கடைப் பற்களின் அகலம் 6.5 முதல் 7.00 மி.மீ எனும் அளவிலும், மேல் முதல் கடைப் பல்லின் நீளம் 22.5 மி.மீ, கடைப் பற்களின் சராசரிக் கிரீடப் பகுதி 8.8 மி.மீ. வேர் நீளம் 13.7 மிமீ என்றும் இருக்கும்.
கீழ்த்தாடை இரண்டாம் கடைப்பல் அளவில் பெரியது. மேல்தாடை முதல் கடைப் பற்கள் மேல்தாடை இரண்டாம் கடைப் பல்லை விட, எல்லாப் பரிமாணங்களிலும் பெரிது. ஆனால், வேர்ப்பகுதி அளவில் குட்டையானது.
கீழ்த்தாடை முதல் கடைவாய்ப்பல் கீழ்தாடை நான்கு கடைப் பற்களினும் சிறியது.
மேற்கத்திய நாட்டு மக்களின் பற்களின் அமைப்பைப் போலவே அனைத்து நாட்டு மக்களின் பற்களின் அமைப்பும் இருக்கும் என்பது பேதைமை. இனத்தால், பண்பாட்டால், சமூக நடைமுறையால், சுற்றுச்சூழல் காரணிகளால் நாட்டுக்கு நாடு மக்களின் பல் அமைப்பு மாறுபடவேச் செய்கிறது.
ஜப்பான், பிரேசில், ஈரான் மற்றும் சௌதி அரேபியாவை சேர்ந்த மக்களுக்குக் கீழ்த்தாடை இரண்டாம் கடைப்பல் பிறவியிலேயே முளைக்காது. இதனை ஆங்கிலத்தில் Congenitally Missing Teeth என்பர். இதனைச் சுருக்கமாக CMT என்கின்றனர்.
பொதுவாக, தடய அறிவியலில் கைரேகை, மரபணு வைத்து குற்றவாளிகளை அடையாளம் கண்டறிவர். திராவிட மக்களுக்கு இரண்டாவது கடைப்பல் பிறவியிலேயே முளைக்காது. அது தடய அறிவியல் அடையாளப்படுத்தலுக்கு மிக உதவும்.
கீழ்த்தாடை முதல் கடைப்பல் கீழ்கண்ட நான்கு மடல்களால் உருவானது.
1. மையப்பகுதி (Mesial)
2. தொலைவுப்பகுதி (Distal)
3. வாய்ப்பகுதி (Buccal)
4. பேச்சுப்பகுதி (Lingual)
கீழ்த்தாடை இரண்டாம் கடைப்பல் கீழ்க்கண்ட ஐந்து மடல்களால் உருவானது.
1. மையப்பகுதி (Mesial)
2. வாய்ப்பகுதி (Buccal)
3. தொலைவுப்பகுதி (Distal)
4. மையப் பேச்சுப்பகுதி (Mesiolingual)
5. தொலைவுப் பேச்சுப்பகுதி (Distolingual)
மேல் தாடை கடைப் பற்கள் கீழ்க்கண்ட மூன்று வகை சாலகங்களை கொண்டவை
1. மைய வாய்ப்பகுதி (Mesio Buccal)
2. தொலைவு வாய்ப்பகுதி (Disto Buccal)
3. பேலடல் (Palatal)
* கடைப் பற்களின் விளிம்புகளின் குறுகிய இடைவெளியில் உணவுத் துகள்கள் சிக்கிக் கொண்டு பற்சொத்தை உருவாகும்.
* மேல்தாடைக் கடைப் பற்களைத் தவிர்த்து, கீழ்த்தாடைக் கடைப் பற்களுக்கு ஒரு வேர்தான் அமைந்திருக்கும்.
* மேல்தாடை முதல் கடைப் பல்லுக்கு இரண்டு வேர்கள் இருக்கும்.
* மேல் கடைவாய்ப் பல்லுக்கு மூன்று வேர்கள் அமைந்திருக்கும்.
* குழந்தைகளுக்கு முதல் கடைவாய்ப்பல் விழுந்த பின்பு, நிரந்தர முன் கடைப் பற்கள் முளைக்கும். அதாவது, 10 முதல் 12 வயதிற்குள் முன் கடைபற்கள் முளைக்கும்.
அடுத்து நாம் நம் வாயிலுள்ள கடைவாய் பற்களை பார்ப்போம்.
ஒரு வயதுக்கு வந்த ஆணுக்கோ பெண்ணுக்கோ மொத்தம் பன்னிரண்டு கடைவாய்ப் பற்கள் இருக்கும்.
1. கீழ்தாடை வலது கடைசியில் மூன்று கடைவாய்ப் பற்கள்
2. கீழ்த்தாடை இடது கடைசியில் மூன்று கடைவாய்ப் பற்கள்
3. மேல் தாடை வலது கடைசியில் மூன்று கடைவாய்ப் பற்கள்
4. மேல் தாடை இடது கடைசியில் மூன்று கடைவாய்ப் பற்கள்
மேல் தாடை கடைவாய்ப் பற்கள் மூன்று முகடுகள் கொண்ட மலை போல் காட்சியளிக்கும். பாலூட்டி இனங்களில் கடைவாய் பற்களின் வளர்ச்சி மேன்மையாக இருக்கும். உணவை அரைக்கக் கடைவாய்ப் பற்கள் பெரிதும் பயன்படும்.
கடைவாய் பற்களை ஆங்கிலத்தில் ‘மோலார்’ (Molar) என கூறுவர். மோலார் என்கிற வார்த்தை லத்தீன் மொழியின் ‘மோலாரிஸ் டென்ஸ்’ என்கிற வார்த்தையிலிருந்து உருவானது. பாலூட்டி வகைகளில் ஒவ்வொன்றுக்கும் ஒவ்வொரு மாதிரியாக கடைவாய்பற்கள் அமைந்திருக்கும். கடைவாய்ப் பற்களில் மூன்றாவது கடைவாய்ப் பல்லாக ஞானப்பல் இணைந்திருக்கும். சில பேர் ஞானப்பல் இல்லாமல் பிறந்திருப்பர். அவர்களுக்கு பனிரெண்டு கடைவாய்ப் பற்களுக்கு பதிலாக எட்டு கடைவாய்ப் பற்கள்தான் இருக்கும்.
நம்முடைய முன்னோர்கள் முரட்டுத்தனமான தாவரங்களையு,ம் கொட்டைகளையும், சரிவர வேக வைக்கப்படாத மாமிசங்களையும் தின்றனர். அதனால் அவர்களுக்கு ஞானப்பற்கள் தேவைப்பட்டன. இப்போது சமைக்கப்படும் உணவுகள் மிகவும் மென்மையாகி விட்டன. அதனால் ஞானப்பற்களின் தேவை இல்லாமல் போய்விட்டது.
ஆண் குழந்தைகளுக்குத் தாய்மார்கள் வாய்வழி முத்தம் கொடுப்பது சரியா?
எம். ஜெகனாரா பேகம், பாலக்காடு
சில தாய்மார்கள் தங்கள் குழந்தைகளுக்கு, குறிப்பாக ஆண் குழந்தைகளுக்கு வாய் வழி முத்தம் தருகிறார்கள். அது கலாசார ரீதியாகவும் மருத்துவ ரீதியாகவும் சரிதானா?
மருத்துவர்கள் ஆ. நிலாமகன் மற்றும் பஹிமா:
முழுக்க முழுக்கத் தவறு. தாயாக இருந்தாலும், மகனாக இருந்தாலும் வாய் வழி முத்தம் உணர்வுகளைத் தூண்டும் செயல். அக்குழந்தைக்குச் சிறு வயதிலேயே பாலுணர்வைத் தூண்டிவிடும் தவறை அந்தத் தாய் செய்கிறார். தவிர, தாயின் வாயில் இருக்கும் கிருமிகள் குழந்தையின் வாய்க்குள் போய் சில தொற்று நோய்களை உருவாக்கி விடும். முத்தம் கொடுக்கும் தாயை அவரது கணவரோ, அவரது பெற்றோரோ, அவரது நெருங்கிய உறவினர்களோ தகுந்த அறிவுரை கூறி தடுத்திட வேண்டும்.
|
பரிணாம வளர்ச்சியில் நமது தாடைகள் சிறுத்து விட்டன. அதனால் குறுகிய வாய்பகுதியில் ஞானப்பற்கள் முளைக்கப் போதிய இடம் இருப்பதில்லை. 53 சதவீதம் பேருக்கு ஒரே ஒரு ஞானப்பல்தான் முளைத்திருப்பதாக ஒரு ஆய்வு கூறுகிறது. சிலருக்கு நான்கு ஞானப்பற்களும் தவ்றிப்போய் விட்டன. ஞானப்பற்களுக்கு பொதுவாக இரண்டு அல்லது மூன்று வேர்கள் உள்ளன. அபூர்வமாக சில ஞானப்பற்களுக்கு நான்கு வேர்கள் உள்ளன. பொதுவாக ஞானப்பற்கள் 17 முதல் 25 வயதில் முளைக்கின்றன.
ஞானப்பற்கள் முளைக்கும் போது கடைசி கடைவாய்ப்பகுதி ஈறு சிவந்து வீங்கியிருக்கும். தாடை வலி இருக்கும். முகத்திலும் வலி தோன்றும். சிலருக்கு ஞானப்பல் ஈறை விட்டு வெளி வராமல் அல்லது தவறான முறையில் முளைத்துப் பிரச்சினை கொடுக்கும்.
பிரச்சனை தரும் ஞானப்பல்லை அகற்றி விடுவதே மிகச் சிறந்தது. எந்த வயதிலும் அகற்றலாம். ஞானப்பல் உணவைக் கடிக்கவோ, மெல்லவோப் பயன்படுவதில்லை. ஆகையால், அகற்றப்படும் ஞானப்பல்லுக்கு மாற்று தேவையில்லை.
ஒரு தடவை ஞானப்பல்லை அகற்றினால் மீண்டும் முளைக்காது. உங்களுக்கு எந்தப் பிரச்சனையும் ஞானப்பல்லால் ஏற்படவில்லை என்றால், அதனை அகற்றாமல் விட்டு வைக்கலாம். ஞானப்பல் தேவை, தேவை இல்லை என்பதனை பல் மருத்துவரிடம் கேட்டு உறுதி செய்யலாம்.