கடந்த பகுதிகளில் பற்களின் நான்கு வகைகளைப் பற்றிப் படித்தோம். இந்தப் பகுதியிலிருந்து பல் சார்ந்த பிரச்சினைகளையும், நோய்களையும் பார்க்கலாம்.
முதலில், பிளவு உதடு மற்றும் பிளவு அண்ணம் (முயல் உதடு) (Cleft Lip & Cleft Palate) குறித்துப் பார்க்கலாம். ஒரு பிளவு உதட்டின் மேல் உதட்டில் ஒரு திறப்பு உள்ளது. அது மூக்கில் நீட்டிக்கப்படலாம். திறப்பு ஒரு பக்கமாகவோ இரு பக்கமாகவோ அல்லது நடுவில் இருக்கலாம். வாயின் கூரையான அண்ணம் மூக்கில் ஒரு திறப்பைக் கொண்டிருக்கும் போது ஒரு பிளவு அண்ணம் ஏற்படுகிறது. இந்தக் குறைபாடுகள் உணவுப் பிரச்சினைகள், பேச்சுப் பிரச்சனைகள்,
செவித்திறன் பிரச்சனைகள் மற்றும் காது நோய் தொற்றுகளை ஏற்படுத்தும்.
முகத்தின் திசுக்கள் சரியாக சேராததின் விளைவே பிளவு உதடுகள் மற்றும் பிளவு அண்ணம். இது ஒரு பிறவிக் குறைபாடு. கருவுற்றிருக்கும் காலத்தில் புகைப்பிடித்தல், நீரழிவு நோய், உடல் பருமன், வயதான காலத்தில் ஒரு பெண் குழந்தை பெற்றுக் கொள்ளுதல், சில வகை மருந்துகள் உட்கொள்வதால் பக்க விளைவுகள் ஏற்படுகிறது. இதன் மூலமாக, பிளவு உதடு குழந்தைகள் பிறக்க காரணமாகிறது. கேளா ஒலி அலகீடு (Ultra Sound Scan) சோதனை மூலம் பிளவு உதடுக் குழந்தைகளைக் கர்ப்பத்திலேயே கண்டறியலாம்.
பிளவு உதடுகளை குழந்தை பிறந்த சில மாதத்திலும், பிளவு அண்ணத்தை குழந்தை பிறந்த 18 மாதத்திற்குள்ளும் அறுவை சிகிச்சை செய்து சரி செய்யலாம். ஆயிரம் பிறப்புகளில் ஒன்று அல்லது இரண்டு குழந்தைகளுக்குப் பிளவு
உதடு அல்லது பிளவு அண்ணம் ஏற்படுகிறது. பெண்களை விட ஆண்களுக்கு இரு மடங்கு பிளவு உதடு அல்லது பிளவு அண்ணம் ஏற்படுகிறது. இந்த மருத்துவ பிரச்சனையால் 1990 ஆம் ஆண்டில் 14,600 மரணங்கள் ஏற்பட்டன. 2017 ஆம் ஆண்டில் 3800 மரணங்களாய்க் குறைந்திருக்கிறது.
பற்களுக்கான குறள்கள்
*புன்னகை நெஞ்சின் புதுமையாய் நின்றிடவே
மென்பல்லின் மேன்மை மதி
* பல்லுடன் சொல்லும் பழகிடல் பேரின்பம்
பல்லைக் கெடுக்காப் பயில்
- தஞ்சாவூர் ஹரணி
|
பிளவு, வாயின் அண்ண அமைப்பை பாதிக்கவில்லை என்றால் அது பிளவு உதடு ஆகும். உதட்டின் மேற்பகுதியில் பிளவு உதடு ஒரு சிறிய இடைவெளியாக அல்லது உதட்டின் ஒரு உள்தள்ளலாக இருந்தால் பகுதி அல்லது முழுமையற்ற பிளவு உருவாகிறது. அது மூக்கில் தொடர் (முழு பிளவு) உதடு பிளவு ஒரு பக்க (ஒரு தலைபட்சம்) அல்லது இரு பக்க (இருதரப்பு) நிலையில் ஏற்படலாம்.
பிளவுபட்டஉதட்டின் லேசான வடிவம் மைக்ரோபார்ம் பிளவு எனப்படும். ஒரு மைக்ரோசாப்ட் பிளவு உதட்டு சிவப்பு பகுதியில் சிறு பள்ளமாக அல்லது உதடு முதல் நாசி வரை ஒரு வடுவாக தோன்றலாம். சில சமயங்களில் வடுவின் அடியில் உள்ள உதட்டு தசை திசு பாதிக்கப்பட்டு மறுசீரமைப்பு அறுவை சிகிச்சை தேவைப்படலாம். மைக்ரோபார்ம் பிளவு கொண்டு பிறந்த குழந்தைகளை கிரானியோபேஷியல் குழு கண்டறியும்.
உதடு பிளவு தீவிரத்தை பொறுத்து பற்களின் வளர்ச்சி தாமதப்படும். சில பல் தொடர்பான பிரச்சனைகள் பால் பற்களைப் பாதிக்கும். இணைந்த பற்கள், முளைக்கத் தவறிய பற்கள், கூடுதல் பற்கள் போன்ற முக்கியப் பிரச்சனைகள்
எல்லாம் நிரந்தரப் பற்கள் முளைத்த பிறகே உருவாகலாம்.
முளைக்கத் தவறிய பற்கள் கூடுதல் பற்கள் சாதாரணமாய் நடக்கக்கூடிய நிகழ்வுகளே. பக்கவாட்டுக் கீறல் பற்கள் காணாமல் போயிருக்கும். பற்சிப்பியில் தாது குறையும் கூடுதல் செல் வளர்ச்சியும் காணப்படும். அதனால்
பல் சொத்தை எளிதில் ஏற்படும். பிளவு உதடு வாய் சுத்தத்தை மோசமாக்கும். பற்குழிகள் அதிகம் ஏற்படும். உணவை மெல்லும் போது சிரமம் ஏற்படும். பேச்சு குழறும்.
பிளவு உதடு குழந்தைகள் சிறப்பாகப் பால் உறிஞ்ச ஹாபர்மேன் பீடர் கருவி பயன்படும். பிளவு உதடுக் குழந்தைகளின் சுயமரியாதை, சமூகத் திறன்கள் மற்றும் நடத்தை கடுமையாகப் பாதிக்கப்படும். பெண் குழந்தைகளுக்குக் கூடுதல் பாதிப்பு. மனரீதியான பிரச்சினைகள் பிளவு உதட்டுக் குழந்தைகளின் தாய்மாரை தாக்கும். பிளவு உதடுக் குழந்தைக்கு 3-5 வயதாகும் போது பிரச்சனை தீவிரம் தெரியாது. பின் வயதாக வயதாகத்தான் அக்குழந்தைகளுக்கு சமூக பதட்டம்
மிகையாகும். அப்போது தான் பிளவு உதடு குழந்தைகளுக்கு கோபம், சோகம், பயம், சக குழந்தைகளிடமிருந்து அந்நியப்படுத்துதல் போன்றவை உருவாகும்.
பிளவு உதடு குழந்தைகளுக்கு பெற்றோரின் அபரிமிதமான ஆதரவு தேவை. 20 முதல் 50 சதவீத பிளவு உதடுகள் பிரச்சினைக்கு மரபணுக் காரணிகளே முக்கியப் பங்கு வகிக்கின்றன. மீதமுள்ள 50 சதவீத பிளவு உதடுகள் சுற்றுச்சூழல்
காரணிகள் மற்றும் மரபணு சுற்றுச்சூழல் காரணமாக ஏற்படுகின்றன.
ஒரு மனிதனின் முகத்தின் வளர்ச்சியானது சிக்கலான மார்போஜெனடிக் நிகழ்வுகள் மற்றும் விரைவான பெருக்க விரிவாக்கம் ஆகியவற்றால் ஒருங்கிணைக்கப்படுகிறது. இதனாலேயேச் சுற்றுச்சூழல் மற்றும் மரபணுக் காரணிகளால் முகவளர்ச்சி எளிதில் பாதிக்கப்படுகிறது.
கருவுற்ற காலத்தில் 6 முதல் 8 வாரங்களில் கருவின் தலையின் வடிவம் உருவாகிறது. அப்போதுதான் ஐந்து பழமையான திசு மடல்கள் வளரும். இந்தத் திசுக்கள் சரியான முறையில் சந்திக்கத் தவறினால் திசுக்கள் இணைந்திருக்க வேண்டிய இடத்தில் இடைவெளி ஏற்படும். இதனால் சிறிய உதடு அல்லது அண்ணபிளவு அல்லது முற்றிலும் தவறான முகம் உருவாகும். பல உதடு பிளவுகள் தலைமுறை தலைமுறையாகத் தொடரும்.
மரபணுக் குறைபாடுகளால் பல வகை நோய்க்குறித் தொகுப்புகள் உருவாகின்றன.
* வான் டெர் வொட் நோய்க்குறித் தொகுப்பு.
* ஸ்டிக்லர் நோய்க்குறித் தொகுப்பு
* ஹர்டிகர் நோய்க்குறித் தொகுப்பு
* டிரிச்சர் காலின்ஸ் நோய்க்குறித் தொகுப்பு.
* பியர் ராபின் நோய்க்குறித் தொகுப்பு.
பிளவுகள் கண்கள், காதுகள், மூக்கு, கன்னங்கள் மற்றும் நெற்றி போன்ற முகத்தின் மற்ற பகுதிகளையும் பாதிக்கும். 1976 ஆம் ஆண்டு பால் டெசியர் 15 வரிப் பிளவுகளை விவரித்தார். இந்த கிரானியோபேஷியல் பிளவுகளில்
பெரும்பாலானவை அரிதானவை. மேற்சொன்ன பிளவுகளை டெசியர் பிளவுகள் என்றழைப்பர். பிளவு உதடு மற்றும் பிளவு அண்ணம் என்பது ஓரோபேஷியல் பிளவுகளின் தொகுப்பிற்கான குடைச்சொல் ஆகும்.
பிளவு உதடு மற்றும் பிளவு அண்ணக் குழந்தைகள் பிறப்பதற்கு முன் கண்டறிய மீயொலி வரைவு (Ultrasonography) துல்லியம், ஒலியியல் வல்லுநர் (Sonologist) அனுபவம், தாயின் உடல் வகை, கருவின் நிலை, அம்னியாடிக் திரவத்தின் அளவு மற்றும் பிளவு வகை முக்கியமாகும். நோயறிதலுக்குப் பிறகு உடனடிக் காலம் மற்றும் பிறந்த முதல் வருடம் பெற்றோருக்கு மிகவும் சவாலானது.
பிளவு உதடு குழந்தைகளை இளமைக்காலம் முழுக்க அல்லது ஆயுட்காலம் முழுக்கக் கவனிக்கக் கீழ்க்கண்ட மருத்துவக் குழு முக்கியம்.
* பிளவு அறுவை சிகிட்சை நிபுணர்
* பல் சீரமைப்பு மருத்துவர்
* பேச்சு மற்றும் மொழி மருத்துவர்
* மனநல நிபுணர்
* காது மூக்கு தொண்டை மருத்துவர்
* மறுசீரமைப்பு நிபுணர்
* ஒலிச்செறிவுமானி தொழில்நுட்ப வல்லுநர்
நீரிழிவு நோயாளிகளுக்குத் தனியாக பற்பசை இருக்கிறதா?
சு. மணிமேகலை, மதுரை - 10.
இனிப்பு கலந்த பற்பசைகளைப் பயன்படுத்துவது நீரழிவு நோயாளிகளுக்குக் கெடுதியா? நீரிழிவு நோயாளிகளுக்குத் தனியாக பற்பசை இருக்கிறதா?
மருத்துவர்கள் ஆ. நிலாமகன் மற்றும் பஹிமா:
இரண்டு கிராம் பற்பசை நீரழிவு நோயாளிகளுக்கு பெரிய அளவில் கெடுதியை ஏற்படுத்தி விடாது. பொதுவாக, பற்பசைகளில் சோடியம் சாக்கரின் கலந்திருப்பர். அது சாதாரண சர்க்கரையை விட 300 மடங்கு தித்திப்பு கூடியது. சோடியம் மோனோப்ளோரோ பாஸ்பேட், மெக்னீசியம் கார்பனேட்டு மற்றும் சோடியம் லாரில் சல்பேட் சுவைகளை மறைக்க சோடியம் சாக்கரின் உதவுகிறது. மார்க்கெட்டில் வீகன்களுக்கும் நீரழிவு நோயாளிகளுக்கும் தனித்தனி பற்பசைகள் கிடைக்கின்றன. Perfora Dream Toothpaste உபயோகித்துப் பயன் பெறலாம்.
|
பிளவு உதடு சிகிட்சையில் சில நேரம் தாடை சீரமைப்புக்காக 10 முதல் 12 வயது வரை மருத்துவர்கள் காத்திருக்க வேண்டியிருக்கும். பிளவு முதல் அறுவை சிகிச்சை செய்யப் பத்து சாதகமான தகவல்கள் தேவை. அவற்றில் சில:
* குழந்தை பிறந்து பத்து வாரம் ஆகி இருக்க வேண்டும்.
* குழந்தையின் எடை குறைந்தது 10 பவுண்ட் அல்லது 4. 536 கிலோ எடை இருத்தல் வேண்டும்.
* குழந்தையின் இரத்தத்தில் ஹீமோகுளோபின் பத்துக்குக் குறையாமல் இருக்க வேண்டும்.
பிளவு உதடை சரி செய்யும் அறுவை சிகிச்சையின் பெயர் மில்லர்டு செயல்முறை, பிளவு உதடு அறுவை சிகிச்சையில் சில வகை அறுவை சிகிச்சைகள் இருக்கின்றன.
* பாலடல் தடுப்பான்
* பிளவு உதட்டை சரி செய்தல்
* மென்மையான அண்ணத்தைச் சரி செய்தல்
* கடினமான அண்ணத்தைச் சரி செய்தல்
* டிம்பனோஸ்ட்மி குழாய் சீரமைப்பு
* பேச்சுச் சிகிச்சை
* அல்வியோலர் பிளவு ஒட்டுதல்.
* ஆர்த்தோடான்டிக்ஸ்
* ஆர்த்தோக்னாதிக் அறுவை சிகிச்சை
பிளவு உதட்டின் திறம்பட மேலாண்மை என்பது பரந்த அளவிலான நிபுணர்களை உள்ளடக்கியது. மீதியை அடுத்த அத்தியாயத்தில் பார்ப்போம்.