ஒவ்வொரு மனிதனின் வாயிலும் 20 பில்லியன் கிருமிகள் உள்ளன. அதாவது, இரண்டரை மடங்கு உலக மக்கள் தொகைக்குச் சமமான கிருமிகள் ஒவ்வொரு மனிதனின் வாய்க்குள்ளும் வாழ்ந்து கொண்டிருக்கின்றன. ஒரு ஆங்கில முத்தம் கொடுக்கும் போது எட்டு கோடி கிருமிகள் இரு வாய்களுக்குள்ளும் இடம் பெயர்கின்றன.
வாய்க்குள் வசிக்கும் 20 பில்லியன் கிருமிகளில் 500 முதல் 650 வகையான இனங்கள் உள்ளன. குடல் பகுதியை அடுத்து அதிக எண்ணிக்கையில் கிருமிகள் இருப்பது மனிதனின் வாயில்தான்.
வாயில் இருக்கும் கிருமிகள்;
* பேக்டீரியா எனப்படும் நுண்ணுயிரி (கோள வடிவம், பிரம்பு வடிவம், சுருள் வடிவம், காற்புள்ளி வடிவம் கொண்ட பேக்டீரியாக்கள்)
* பூஞ்சைக் கிருமிகள்
* வைரஸ் என்கிற தீநுண்மி
* நுண்ணிய ஓரணு உயிரி எனப்படும் புரோட்டோஜோவா
ஒரு மனிதன் வாயை வைத்து என்னென்ன செய்யலாம்? சாப்பிடலாம் (எதிர்மறையாக, புகைக்கலாம் வெற்றிலைப் பாக்கு போடலாம்), பேசலாம் (நல்லதும் கெட்டதும்), தற்காப்புக்குக் கடிக்கவும் செய்யலாம். மூக்கால் சுவாசிக்க முடியாத போது, வாய்வழியேச் சுவாசிக்கலாம், மகிழ்ச்சியாகச் சிரிக்கலாம்.
பற்களுக்கான குறள்கள்
* பட்டென பட்டாணி கடிக்க பல்லில்லாதோருக்கு
டைட்டானிக் பல்லுக்கு வேர்.
* பல்லிலார் எல்லாம் கரைத்து உண்பர்
பல்லுடையார் உண்பர் கடித்து.
- தேஜஸ் சுப்பு என்கிற கனலி
|
எல்லாவற்றுக்கும் முதன்மையான பயன்பாடு ஒன்று உள்ளது. அது வாயால் முத்தமிடுவது.
தாய்லாந்தில் பட்டாயா எனும் இடத்தில் 12-02-2013 அன்று எக்காசாய் - லக்சனா திரனாத் எனும் இணையர் தொடர்ந்து 58 மணி நேரம் 35 நிமிடங்கள் முத்தமிட்டு, தங்கள் முத்த மராத்தானைக் காதலர் தினத்தில் நிறைவு செய்தனர். இது ஒரு கின்னஸ் உலகச் சாதனை. இது ஒரு தகவலுக்காக... மட்டும்.
முத்தத்தில் பல வகைகள் உள்ளன. அவைகளில் சில கீழே;
* கொசுறு முத்தம்- எவ்விதக் குறிக்கோளும் இல்லாது மிகச் சாதாரணமாக, அன்பைக் காட்டக் கொடுக்கப்படும் மூன்று நொடி முத்தம்.
* கன்னத்தில் முத்தம் - வன்முறை இல்லாத சைவ முத்தம்.
* நெற்றி முத்தம் - ஆசிர்வாத முத்தம்.
* கையில் முத்தம் - நன்றி சொல்லும் முத்தம்.
* பிரஞ்ச் முத்தம் - காதலர் மற்றும் தம்பதியினர் தரும் முத்தம்.
* காதுமடல் முத்தம் - குழந்தைகளுக்குத் தரலாம்.
* கழுத்து முத்தம் - ரசனையான முத்தம். (வசந்த மாளிகை படத்தில் சிவாஜி, வாணிஸ்ரீக்குக் கொடுத்த முத்தம்)
* மூக்கு முத்தம் - அதிகப் பிரசங்கிதனமான மூக்கைச் செல்லமாகக் க(ண்)டிக்கும் முத்தம்.
நாம் கொடுக்கும் இந்த முத்தத்தால் பத்து பைசா பயன் உண்டா? முத்தம் நேர விரயம் என்போருக்கு, விஞ்ஞானப் பூர்வமான பதில் இதோ;
* முத்தம் மனிதர்களுக்குள் உணர்வுப்பூர்வமான பிணைப்பைத் தருகிறது.
* முத்தம் மன அழுத்தத்தைக் குறைக்கிறது.
* தாம்பத்யத்தை முழுமைப்படுத்துகிறது.
* ஜீரண சக்தியை துரிதப்படுத்துகிறது.
* உமிழ்நீர்ச் சுரப்பை அதிகப்படுத்தி வாய் நலத்தை மேம்படுத்துகிறது.
* நோய் எதிர்ப்புச் சக்தியை வீரியப்படுத்துகிறது.
எந்த வயதில் முத்தமிட ஆரம்பிக்கலாம் என்கிறீர்களா?
15 வயதுக்கு மேல் முத்தங்கள் தர, பெறத் தொடங்கலாம்.
முத்தங்களில் எவ்வகை முத்தம் முதலிடம்? எனில், சந்தேகமில்லாமல் பிரஞ்ச் முத்தம்தான்.
மனிதர்கள் மட்டுமில்லை, நாய்கள், ஒட்டகச் சிவிங்கிகள், அணில்கள், டால்பின்கள், பாண்டா கரடிகள், பஞ்சவர்ணக் கிளிகள், பூனைகள் என்று மிருகங்களும் முத்தம் கொடுத்துக் கொள்கின்றன.
முத்தமிடுவதில் லாபக் கணக்கும் உண்டு, நஷ்டக் கணக்கும் உண்டு. முத்தம் தருபவர்கள் வாய்ப் பராமரிப்பு சரியாக மேற்கொண்டிருந்தால், அவர்களின் முத்தம் முழுக்க லாபக்கணக்குதான். முத்தமிடும் போது நமக்குள் ஆக்ஸிடோஸின் ஹார்மோன் பீரிடுகிறது. உடன் டோபோமைனும் செரட்டோனினும் இலவச இணைப்பாய்ச் சுரக்கின்றன.
* ஸ்ட்ரப்போகாக்கஸ் மைடிஸ் – பாக்டீரியா
* பிரிவோடெல்லா – பாக்டீரியா
* ஆக்டினோமைசெஸ் – பாக்டீரியா
* நைஸெரியா- பாக்டீரியா
* ரோத்தியா – பாக்டீரியா
ஆக்ஸிஜன் தேவையே இல்லாமல் உயிர் வாழும் இரு கிருமிகளைப் பார்ப்போம்.
* ட்ரைபோனிமா டென்டிகோலா, போர்பைரோமோனாஸ் ஜிஞ்சிவாலிஸ்.
உமிழ்நீரில் காணப்படும் கிருமிகளின் பட்டியல் ஒன்றிருக்கிறது. அவை;
* சோலோபேக்டீரியம்
* ஹீமோபிலஸ்
* கோர்னி பேக்டீரியம்
* ஸ்ட்ரப்டோகாக்கஸ்
* காம்பைலோபேக்ட்டர்
* செல்லுலோசி மைக்ரோபியம்
தீமை பயக்கும் கிருமிகள் மட்டும்தான் வாய்க்குள் வசிக்கின்றனவா? மனிதருக்கு நன்மை பயக்கும் சாதுக்கிருமிகள் வாயில் இல்லையா? என்றால் அதுவும் இருக்கத்தான் செய்கின்றன. அவை;
* லாக்டோபேசிலஸ் ரூடெரி
* லாக்டோபேசிலஸ் சலைவாரியஸ்
* ஸ்ட்ரப்டோகாக்கஸ் சலைவாரியஸ் கே 12
* லாக்டோபேசிலஸ் சகேய்
முக அழகு கேள்வி பதில்
ஆயிஷா பேகம்:
குழந்தைகள் விரல் சூப்புதல் நல்லதா, கெட்டதா? தெற்றுப்பல் அதிர்ஷ்டம் என்கிறார்களே, உண்மையா? தெற்றுப் பல்லைச் சரி செய்ய முடியுமா?
மருத்துவர்கள் ஆ. நிலாமகன் மற்றும் பஹிமா:
குழந்தைகளுக்குச் சரியான நேரத்தில், அதற்குத் தேவையான பால், உணவு கிடைக்காத போது, அக்குழந்தை விரல் சூப்பும் பழக்கத்தை ஏற்படுத்திக் கொள்கிறது. விரல் சூப்பும் பழக்கம் தற்காலிகமாகத் தொடங்கினாலும், பிற்காலத்தில் அதை நிறுத்துவது சிறிது கடினமாகி விடுகிறது. விரல் சூப்பும் பழக்கத்தால் குழந்தைகளின் முக அமைப்பு மாறிப் போய் விடுகிறது. அதனால், கிராமப் பகுதிகளில் சிறு வயதில் குழந்தைகள் விரல் சூப்புவதைத் தடுக்க, சூப்பும் விரல்களில் வேப்பெண்ணெய் தடவும் வழக்கம் இருக்கிறது. விரல் சூப்பும் பழக்கத்தால் குழந்தைப் பருவத்திலேயேத் தெற்றுப்பல் ஏற்படுகிறது. இந்தத் தெற்றுப் பல்லை 12 முதல் 30 வயதிற்குள் பல் மருத்துவம் மூலம் சரி செய்து விடலாம். இந்தப் பல் சீரமைப்புச் சிகிச்சைக்கு பல் மருத்துவத்தில் Orthodontics எனும் சிறப்புப் பாடத்தில் முதுநிலை படித்தவர்களைக் கொண்டு, கிளிப் பொருத்திச் சரி செய்யலாம்.
|
இருப்பினும், இங்கு முத்தமிடுவதில் சில தகவல்களைக் கருத்தில் கொள்ளலாம்.
* வாய்ப்புண் உள்ளவர் முத்தமிட்டால் எதிராளிக்கு நோய்கள் பரவும். குறிப்பாக, ஹெச்ஐவி எனப்படும் எய்ட்ஸ்
* டூத் பிரஷ் எனப்படும் பல் துலக்கியை ஒருவருக்கொருவர் மாற்றிக் கொண்டால் ஹெபடைடிஸ் பி எனும் மஞ்சக்காமாலை நோய் தொற்றும்.
* ட்ரை குளோசான் மற்றும் கோபாலிமர் இரசாயனம் உள்ள பற்பசைகளைப் பயன்படுத்தி வாய்கிருமிகளை அழித்தொழிக்கலாம்.
வாயைச் சுத்தமாக வைத்துக் கொள்ள எளிய வழிகள் இருக்கின்றன. அவற்றில்;
* நாள்தோறும் இரு முறை பல் துலக்குதல்
* எதனைச் சாப்பிட்டாலும் வாயை நன்றாகக் கொப்பளித்தல்.
* பெராக்ஸைடு கலந்த மவுத் வாஷ்களை பயன்படுத்துதல்.
* உப்பு நீர் கொண்டு வாய் கொப்பளிப்பது நல்லது.
* நாக்கைச் சுத்தப்படுத்துதல்.
* நிறையத் தண்ணீர் அருந்துதல்.
* ப்ரோபயாட்டிக் (உணவாய் எடுத்துக் கொள்ளப்படும் நுண்ணுயிர்கள்) குடித்தல்.
* நார்ச்சத்து உணவை நிறைய உண்ணுதல்.
* நாள்தோறும் நல்ல, சுத்தமான தேன் குடிக்கலாம். (அமிலச் சுரப்பைத் தடுக்கும். கிருமிப் பெருக்கத்தை நிறுத்தும். டெக்ஸ்ட்ரான் சுரக்கும்)
* கிராம்புத் தைலம், லெமன் கிராஸ் எண்ணெய், தேயிலை மர எண்ணெய், லாவண்டர் எண்ணெய், நல்லெண்ணெய் போன்றவை வாய்ப் பராமரிப்புக்கு நல்லது.