கடந்த பகுதிகளில் வாய், நாக்கு, உதடுகள், தொண்டை பற்றித் தெரிந்து கொண்டோம். தற்போது பற்களைப் பற்றித் தெரிந்து கொள்வோம்.
ஓர் ஆணுக்கோ, ஒரு பெண்ணுக்கோ 32 பற்கள் இருக்கும். அந்த 32 பற்களில் நான்கு வகை உண்டு. முதலில், கீறல் அல்லது வெட்டுப்பற்கள் குறித்துப் பார்க்கலாம்.
வெட்டுப் பற்களுக்கான ஆங்கிலச் சொல்லான ‘Incisor’ என்கிற சொல், ‘Incider' என்கிற லத்தீன் சொல்லிலிருந்து தோன்றியது. இதற்கு, ‘துண்டு செய்’ என்று பொருள். 32 பற்களில் வெளித்தோற்றத்தில் நன்கு தெரிவது வெட்டுப் பற்களே. மேல் முன்புறத் தாடையில் நான்கு பற்கள். கீழ் முன்புறத் தாடையில் நான்கு பற்கள் என்று, வெட்டுப்பற்கள் புறத்தோற்றத்தில் உளி போலக் காட்சியளிக்கும். தட்டையான அகலமான மண்வெட்டி போன்ற அமைப்பு வெட்டுபற்களும் உண்டு.
பற்களுக்கான குறள்கள்
* முத்துப் பல்லும் முல்லை சிரிப்பும் மட்டுமல்ல
தெத்துப் பல்லும் ஓரழகே.
* சொற்குத்தல் போலவே கொடுமை உண்டபின்
பற்குத்தல் நிதமும் செய்தல்.
- தேஜஸ் சுப்பு என்கிற கனலி
|
முதன்முதலில் குழந்தைகளுக்கு வெட்டுப்பற்கள்தான் முளைக்கின்றன. மேலிரு நடு பற்கள் குழந்தைப் பற்கள் எனப்படும். 8 முதல் 12 மாதம் வரையிலான குழந்தைகளுக்கு முளைக்கும். 6 முதல் 7 வயதில் இந்தக் குழந்தை பற்கள் விழுந்து, அதன் பின்னரே நிரந்தரப் பற்கள் முளைக்கின்றன.
வெட்டுப் பற்கள் சிரிக்க, உண்ண, பேச எனும் மூன்று முக்கியப் பணிகளைச் செய்கின்றன. உண்ணும் உணவைத் துண்டு பண்ணுதலும், உணவை வாய்க்குள் தள்ளுதலும் வெட்டுப் பற்களின் முதன்மையான பணியாக இருக்கின்றன. மனிதனின் பற்கள் எலும்புகளால் ஆனது அல்ல. பற்கள் எலும்புகள் போல் தோற்றமளிக்க மிளரி என்கிற கனிமப் பூச்சு பயன்படுகிறது. எலும்புகள் உடைந்தால் தன்னைத்தானே பழுது பார்த்துக் கொள்ளும். ஆனால் பற்களில் எலும்பு மஜ்ஜை இல்லை.
வெட்டுப் பற்களே ஓர் ஆண் அல்லது ஒரு பெண்ணின் ஆளுமையை தீர்மானிக்கிறது. சாப்பிட்ட அரை மணி நேரம் கழித்துத்தான் பல் துலக்க வேண்டும். சாப்பிட்ட சிறிது நேரத்துக்கு பல்லின் கனிம பூச்சு மிருதுவாக இருக்கும். அரை மணி நேரத்துக்கு பின்புதான் கனிம பூச்சு இயல்பு நிலைக்கு மீளும்.
வெட்டுப் பற்களில், பலருக்கு மேல் நடு பற்களுக்கு இடையேச் சிறு இடைவெளி இருக்கும். பின்பற்களிலும் கூட சிலருக்கு இடைவெளி இருக்கும். குழந்தைப் பருவத்தில் பெரும்பாலும், பலருக்கு இந்த இடைவெளி இருக்கும். பெரியவர்கள் ஆனதும் இந்த இடைவெளி மறைந்து விடும். பொதுவாக இந்த இடைவெளி 0.5 மி.மீ அல்லது 0.02 அங்குலம் இருக்கும்.
இந்தப் பல்லின் இடைவெளியை, பல் மருத்துவத்தில் டயஸ்டெமா (Diastema) என்பர். கீழ் பல் இடைவெளியை, கீழ்த்தாடைப் பல்லின் இடைவெளி (Mandibular Diastema) என்றும், மேல் பல்லின் இடைவெளியை, மேல்தாடைப் பல்லின் இடைவெளி (Maxillary Midline Diastema) என்றும் அழைக்கின்றனர். மேல்தாடைப் பல்லின் இடைவெளி 25.4 சதவீத பேர் வரை இருக்கிறது. இந்தப் பல்லின இடைவெளியைப் பல சமூகத்தினர் அதிர்ஷ்டமாகக் கருதுகின்றனர். ஆனால், பல்லின இடைவெளி தோன்ற கீழ்க்கண்ட காரணங்களைக் கூறலாம்.
* கீழ்த்தாடை எலும்புக்கும் மேல்தாடை எலும்புக்கும் பொருத்தமில்லாத சிறு பற்கள் முளைப்பது பல்லின் இடைவெளிக்குக் ஒரு காரணமாக இருக்கிறது.
* மரபியல் தொடர்ச்சியால், பெற்றோர்களைத் தொடர்ந்து குழந்தைகளுக்கும் பல்லின் இடைவெளி வருகிறது.
* மேல் உதட்டுக்கும், முன் பற்களுக்கும் இடையே இழுமடி (Frenum) அதீத வளர்ச்சியடைவதால் ஏற்படுகிறது.
* ஈறு நோய்களாலும் ஏற்படுகிறது.
* விரல் சூப்பும் பழக்கத்தினாலும் வருகிறது.
* அடிக்கடி நாக்கு துருத்தும் பழக்கத்தினாலும் வருகிறது.
* கூடுதல் பல் முளைப்புகளாலும் வருகிறது.
சொத்தைப் பல்லுக்குத் தங்கப்பல்
சி. பிருந்தாவதனன், திண்டிவனம்.
சொத்தைப் பல்லுக்கு வேர் சிகிச்சை செய்து, அதற்கு மேலாகத் தங்கப்பல் பொருத்திக் கொள்ள முடியுமா?
மருத்துவர்கள் ஆ. நிலாமகன் மற்றும் பஹிமா:
சொத்தைப் பல்லை முழுவதும் அகற்றி விட்டு, பல் பதியவைப்பு முறையில் (Implant) செய்து தங்கப்பல் பொருத்திக் கொள்ளலாம். பல் சொத்தையை மட்டும் அகற்றிவிட்டு, அதனுள் தங்கத்தை நிரப்பலாம். அல்லது வேர் சிகிச்சை செய்து கொண்டு தங்கத்திலான பல் தொப்பியை அணிவிக்கலாம். தங்கம், பல்லடியம், பிளாட்டினம் கலந்த மூன்று உலோகங்கள் (அல்ல்லது) குரோமியம், நிக்கலில் தங்கப்பூச்சு கொண்ட தங்கப்பல்லைக் கட்டிக் கொள்ளலாம். தங்கப்பல் கட்டுவது நீண்ட காலம் நீடிக்கக் கூடியது என்றாலும், அதன் மஞ்சள் நிறம் மற்ற வெள்ளைப் பற்களிலிருந்து வித்தியாசமான தோற்றத்தைத் தரும். தங்கள் புன்னகை, தங்கப் புன்னகையாகத் தெரிய தங்கப் பல் கட்டிக் கொள்ளலாம்.
|
பல்லில் இடைவெளி இருப்பதால், சில பிரச்சனைகள் ஏற்படுகின்றன.
* வாய் திறந்து சிரிக்கக் கூச்சமாகவும், அவமானமாகவும் இருக்கும். இதனால் பல்லின இடைவெளி உள்ளவருக்கு, ஒரு தாழ்வு மனப்பான்மை உருவாகும்.
* உணவை கடிக்கும் மெல்லும் போது சில பிரச்சனைகள் தோன்றுகின்றன.
* செரிமானக் கோளாறுப் பிரச்சனைகள் ஏற்படுகின்றன.
* ஈறுகளில் இரத்தம் கசிவு வருகின்றன.
* பேசுவதில் குறைபாடு வருகின்றன. பேச்சுக்கு இடையே விசில் சப்தம் எழலாம். தமிழ் எழுத்துகளான ழ, ல, ர, ற உச்சரிப்பில் குழப்பமேற்படும்.
* சிலருக்கு ஈறு பின் வாங்குதல், பல் இழப்பு காரணமாக வயதாக வயதாக பல்லின் இடைவெளி அதிகரிக்கும்.
இந்தப் பல்லின் இடைவெளிப் பிரச்சனை மனிதர்களுக்கு மட்டுமின்றி, ஆடுகள், நீர் நாய்கள், எலிகளுக்குக் கூட இருக்கின்றன.
இந்தப் பல்லின இடைவெளியைச் சரி செய்யக் கீழ்க்கண்ட வழிமுறைகள் பயன்படுகின்றன.
* ஈறுதட்டு தசை நாண் நீக்கம் (Frenectomy)
* கண்ணுக்கு தெரியாத பிடிப்பு ஊக்குகள் பொருத்தல். இன்விசாலைன் (Invisalign) எனப்படும் பிடிப்பு ஊக்குகள் மாட்டலாம். இது கழற்றி மாட்ட எளிதானது, பல் துலக்குவது கடினமாக இருக்காது. சில அமர்வுகளில் இதனை பொருத்திக் கொள்ளலாம்.
* போர்சலின் காரைப்பூச்சு (Porcelain Cement)
* பல் தொப்பி (Dental Crowns)
* பல் இணைப்புகள்
நம் வசதிக்கேற்ற வகையில், இந்த வழிமுறைகளில் ஏதாவதொன்றின் மூலம் பல்லின் இடைவெளியைச் சரி செய்து கொள்வது, பற்களுக்குப் பாதுகாப்பாக அமையும்.