திருமணத்தின் போது, அவரவரின் மரபுகளின்படி நிறைய சடங்குகள் அமைந்திருந்தாலும், சனாதன தர்மத்தின் படி ஒரு சில பொதுவான சடங்குகள் அமைந்துள்ளன. அதிலொன்றுதான் சப்தபதி எனும் சடங்கு ஆகும். இந்தச் சடங்கில் கணவனும் மனைவியும் கைகளைக் கோர்த்து அக்கினி சாட்சியாக “ஏழு அடிகள்” வலம் வருவர். திருமண நிகழ்வில் அக்கினி என்பது ஜோதிவடிவான பரம்பொருளைக் குறிக்கின்றது. ஒவ்வொரு திருமணத்திற்கும் இறைவனேச் சாட்சியாக அமைந்துள்ளார். எனவே, இந்த ஏழு வாக்குறுதிகளையும் கடைப்பிடிக்க வேண்டியது கணவன், மனைவியின் தர்மம் ஆகும்.

1. கணவனும் மனைவியும் எப்போதும் தங்கள் வாழ்க்கையில் சுக துக்கங்களையும் குடும்பச் சுமையையும் சரிசமமாகப் பகிர்ந்து கொள்ள வேண்டும்.

2. இருவரும் ஒரே மனதாக இணைந்திருந்து, இருவருக்கும் ஒப்புதலுடைய செயல்களையேச் செய்ய வேண்டும்.

3. இருவரும் தங்களின் குடும்பத்தினரை மதித்து நடக்க வேண்டும்.

4. இருவரும் ஒன்றாக இருந்து அவர்களின் குழந்தைகளை வளர்த்து, குழந்தைகளின் தேவைகளைப் பூர்த்தி செய்து, நிறைவான கல்வியை அளிக்க வேண்டும்.

5. இருவரும் குடும்பப் பொருளாதாரத்தை சரிசமமாகக் கவனித்துக் கொள்ள வேண்டும்.


6. இருவரும் பதி - பதினி தர்மத்தைக் கடைப்பிடிக்க வேண்டும். பதி என்றால் தலைவன், பதினி என்றால் தலைவி. ஒரு குடும்பத்தின் தலைவன் கணவன், தலைவி மனைவி. கணவன் மனைவியை தவிர, மற்ற பெண்களிடமும், மனைவி கணவனைத் தவிர மற்ற ஆண்களிடமும் தகாத உறவு வைத்துக் கொள்ளக் கூடாது. இதுவே பதி - பதினி தர்மம் ஆகும்.

7. கணவனும் மனைவியும் ஒருவரை ஒருவர் மனதாலும், வாக்காலும், செயலாலும் நோகடிக்க கூடாது. ஒருவருக்கொருவர் அன்பு, இனிமை, அரவணைப்பு ஆகியவற்றைப் பகிர்ந்து கொண்டு மகிழ்ச்சியுடன் இருக்க வேண்டும்.