ஞாயிற்றுக்கிழமை

தள்ளிப்போகும் திருமணங்களுக்குப் பரிகாரம் காண மணமகனோ, மணமகளோ ஒவ்வொரு ஞாயிற்றுக்கிழமையும் இராகு காலத்தில் (4.30-6.00) பைரவருக்கு அர்ச்சனை, ருத்ராபிஷேகம், வடை மாலை சாற்றி வழிபட்டால் தடைகள் நீங்கித் திருமணம் கைகூடும். கடன் வாங்கி வட்டியும், அசலும் கட்ட முடியாமல் தவிப்பவர்கள் இராகு காலத்தில் காலபைரவருக்கு முந்திரிப்பருப்பு மாலை கட்டி, புனுகு சாற்றி, வெண் பொங்கல் நைவேத்தியம் இட்டு வழிபட்டுப் பிரார்த்தனை செய்தால் நலம் கிடைக்கும். சிம்ம ராசிக்காரர்கள் இந்தக் கிழமையில் வழிபடுவது சிறப்பு.

திங்கட்கிழமை

வில்வார்ச்சனை செய்திட சிவனருள் கிட்டும். திங்கட்கிழமை அல்லது சங்கடஹர சதுர்த்தியன்று பைரவருக்கு பன்னீர் அபிஷேகம் செய்து, சந்தனக் காப்பிட்டு புனுகு பூசி, நந்தியாவட்டை மலர் மாலை அணிவித்து வழிபட்டு வந்தால் கண் சம்பந்தப்பட்ட நோய்கள் விலகும். கடக ராசிக்காரர்கள் இந்தக் கிழமையில் வழிபடுவது சிறப்பு.

செவ்வாய்க்கிழமை

மாலையில் மிளகு தீபம் ஏற்றி வழிபட்டு வந்தால், இழந்த பொருளைத் திரும்பப் பெறலாம். எல்லா அஷ்டமிகளிலும் பைரவர் விரதம் இருக்கலாம். ஆனால் செவ்வாய்க்கிழமைகளில் அஷ்டமி இணைந்து வந்தால், அதைவிடச் சிறப்பான நாள் ஏதுமில்லை. குறைந்தபட்சம் 21 அஷ்டமிகள் தொடர்ந்து விரதம் இருக்க வேண்டும். அதிகாலையில் நீராடி, பைரவரை மனதில் நினைத்து வணங்க வேண்டும். பகலில் ஏதாவது ஒரு பொழுது மட்டும் எளிய உணவு சாப்பிடலாம். இரவில் கண்டிப்பாகச் சாப்பிடக்கூடாது. அன்று மாலை பைரவருக்கு வடை மாலை சாற்றி வழிபட வேண்டும். வசதி குறைந்தவர்கள் ஒரு தீபம் மட்டும் ஏற்றினால் போதும். மறுநாள் நவமியன்று காலை மீண்டும் கோயிலுக்குச் சென்று விநாயகர், சிவன், அம்பாள், பைரவரை வணங்கி, ஏழைகளுக்கு அன்னதானம் அளிக்க வேண்டும். சிறிதளவு சர்க்கரைப் பொங்கல் செய்து, குழந்தைகளுக்குக் கொடுத்தால் நல்லது. பிறகு வீட்டிற்கு வந்து பூஜையறையில் பூஜை முடித்து, இனி என்னால் யாருக்கும் எந்தக் கெடுதலும் வராது என உறுதிமொழி எடுக்க வேண்டும். சாப்பிட்டு விரதத்தை நிறைவு செய்ய வேண்டும். பைரவ விரதத்தின் நோக்கமே கேடுகளை அழிப்பதுதான். மேஷம், விருச்சிக ராசிக்காரர்கள் இந்தக் கிழமையில் வழிபடுவது சிறப்பு.


புதன்கிழமை

நெய் தீபம் ஏற்றி வழிபட்டால் பூமி லாபம் கிட்டும். மிதுனம், கன்னி ராசிக்காரர்கள் இந்தக் கிழமையில் வழிபடுவது சிறப்பு.

வியாழக்கிழமை

விளக்கேற்றி வந்தால் ஏவல், பில்லி சூன்யம் விலகும். தனுசு, மீனம் ராசிக்காரர்கள் இந்தக் கிழமையில் வழிபடுவது சிறப்பு.

வெள்ளிக்கிழமை

மாலையில் வில்வ இலைகளாலும், வாசனை மலர்களாலும் சகஸ்ரநாம அர்ச்சனை செய்து வந்தால் வறுமை நீங்கி, செல்வப் பேறு கிட்டும். ரிஷபம், துலாம் ராசிக்காரர்கள் இந்தக் கிழமையில் வழிபடுவது சிறப்பு.

சனிக்கிழமை

சனி பகவானுக்கு குரு பைரவர். ஆகவே சனிக்கிழமையன்று இவரைப் பிரத்யேகமாக வழிபடுவதால், அஷ்டமச்சனி, ஏழரைச்சனி, அர்த்தாஷ்டமச் சனி விலகி நல்லவை நடக்கும். மகரம், கும்ப ராசிக்காரர்கள் இந்தக் கிழமையில் வழிபடுவது சிறப்பு.