பதினெட்டாம் பெருக்கு என்பது, ஆடி மாதம் பதினெட்டாம் நாள் கொண்டாடப்படும் ஒரு விழாவாகும். இதனை ஆடிப்பெருக்கு என்றும், ஆடிப்பதினெட்டு என்றும், கொங்குத் தமிழ் பேச்சு வழக்கில் ஆடி நோம்பி என்றும் அழைக்கின்றனர். தமிழ்நாட்டில் விண்மீன்களை அடிப்படையாகக் கொண்டும், கிழமைகளைக் கொண்டுமேப் பெரும்பான்மையான விழாக்கள் நடத்தப்படுகின்றன. ஆனால், நாட்களின் எண்ணிக்கையை அடிப்படையாகக் கொண்டு செய்யப்படும் ஒரே விழாவாக, ஆடி மாதம் பதினெட்டாவது நாள் விழா இருக்கிறது. தமிழக ஆறுகள் பெருக்கெடுத்து ஓடுவதைக் குறிக்கும் விழாவாக இவ்விழா இருக்கிறது.

தென்மேற்குப் பருவத்தில் ஆற்றின் நீர்ப்பிடிப்பு இடங்களில் பெய்த மழையினால் ஆறுகளில் புதுப்புனல் பொங்கி வரும். இதனையே ஆற்றுப்பெருக்கு எனக்கூறுவர். இதனால், உழவர்கள் இந்நாளில் நம்பிக்கையுடன் பட்டம் பார்த்து விதை விதைப்பர். இம்மாதப் பொழுதில் நெல், கரும்பு முதலியவற்றை விதைத்தால், அவர்கள் அதனை தை மாதத்தில் அறுவடை செய்ய முடியும். அதற்கு வற்றாத நதிகளைத் தங்கள் தெய்வமாக போற்றி மகிழ்ந்து, பூசைகள் செய்து, பின் உழவு வேலையைத் தொடங்குவார்கள். இதனையொட்டியே “ஆடிப்பட்டம் தேடி விதை” என்ற பழமொழி விளைந்தது.

இவ்விழா நாளில் மக்கள் ஆற்றங்கரைகளில் கூடி ஆற்றுப் பெருக்கைக் கண்டு களிப்பர். கோயில்களில் சென்று வழிபடுவர். இந்நாளில், பெண்கள் ஆற்றில் குளித்து ஆற்றங்கரையில் ஒவ்வொருவரும் பூஜை செய்ய ஒரு இடத்தைத் தேர்வு செய்து, அந்த இடத்தைச் சுத்தம் செய்து, பசு சாணத்தால் மெழுகி, அதன் மேல் வாழை இலையை விரித்து அகல்விளக்கு ஏற்றி வைக்கின்றனர். வழிபாட்டில் வெற்றிலை, பாக்கு, பழம் படைத்து, பத்தி, கற்பூரம் காட்டி, தடங்கல் இல்லாத விளைச்சலுக்கு நீருக்கு நன்றி செலுத்தி, வாழை மட்டையில் விளக்குகள் ஏற்றி, அதை ஆற்றில் விடுவார்கள். இவை தவிர, தங்கள் வீட்டில் தேங்காய்ச் சாதம், சர்க்கரைப் பொங்கல், எலுமிச்சம்பழச் சாதம், தக்காளிச் சாதம், தயிர்ச் சாதம் போன்ற பல விதமான கலப்பு சாதங்கள் செய்து, அதை ஏதாவது ஆற்றங்கறையில் வைத்து குடும்பத்தினர் மற்றும் நண்பர்களுடன் சேர்ந்து சாப்பிடுவார்கள்.


இவ்விழா காவிரியாற்றின் கரையில் உள்ள ஊர்களில் மிகவும் சிறப்புடன் நடத்தப் பெறுகிறது. அதாவது, தமிழகத்தின் ஒகேனக்கல் நீர்வீழ்ச்சி தொடங்கி, காவிரி சங்கமிக்கும் பூம்புகார் நகரம் வரை இவ்விழா மிகச் சிறப்பாகக் கொண்டாடப்படுகிறது.

திருச்சி ஸ்ரீரங்கத்தில், அம்மா மண்டபம் படித்துறையில், காவிரிக்குச் சீர்கொடுக்கும் நிகழ்ச்சி மிகச் சிறப்பாக நடக்கும். ஆடிப்பெருக்கு நாளன்று ஸ்ரீரங்கம் கோயிலில் இருந்து உற்சவர் நம்பெருமாள் புறப்பட்டு அம்மா மண்டபம் படித்துறைக்கு வருவார். அங்கு சுவாமிக்கு திருமஞ்சனம் நடக்கும். மாலை வரை பெருமாள் அங்கு வீற்றிருப்பார். பெருமாளின் சீதனமாக தாலிப்பொட்டு, பட்டு மற்றும் மங்களப் பொருட்கள் ஆற்றில் விடப்படுகிறது.