சொல்லுதல் என்பதைச் சாதாரணமாகச் சொன்னாலும், சொல்லுதலின் வகைகளைக் குறிக்க தமிழில் ஏறத்தாழ முப்பத்தொன்பது சொற்கள் உள்ளன. அவை;
1. அசைத்தல் - அசையழுத்தத்துடன் சொல்லுதல். அசையழுத்தம் (accent)
2. அறைதல் - அடித்து (வன்மையாய் மறுத்து)ச் சொல்லுதல்
3. இசைத்தல் - ஓசை வேறுபாட்டுடன் சொல்லுதல்
4. இயம்புதல் - இசைக்கருவி இயக்கிச் சொல்லுதல்
5. உரைத்தல் - அருஞ்சொற்களுக்கு அல்லது செய்யுள்களுக்குப் பொருள் சொல்லுதல்
6. உளறுதல் - ஒன்றிருக்க ஒன்றைச் சொல்லுதல்
7. என்னுதல் - என்று சொல்லுதல்
8. ஓதுதல் - காதிற்குள் மெல்லச் சொல்லுதல்
9. கத்துதல் - குரலெழுப்பிச் சொல்லுதல்
10. கரைதல் - அழைத்துச் சொல்லுதல்
11. கழறுதல் - கடிந்து சொல்லுதல்
12. கிளத்தல் - இன்னதென்று குறிப்பிட்டுச் சொல்லுதல்
13. கிளத்துதல் - குடும்ப வரலாறு சொல்லுதல்
14. குயிலுதல் - குயில்போல் இன்குரலிற் சொல்லுதல் குயிற்றுதல்
15. குழறுதல் - நாத் தளர்ந்து சொல்லுதல்
16. கூறுதல் - கூறுபடுத்திச் சொல்லுதல்
17. சாற்றுதல் - பலரறியச் சொல்லுதல்
18. செப்புதல் - வினாவிற்கு விடை சொல்லுதல்
19. நவிலுதல் - நாவினால் ஒலித்துப் பயிலுதல்
20. நுதலுதல் - ஒன்றைச் சொல்லித் தொடங்குதல்
21. நுவலுதல் - நூலின் நுண்பொருள் சொல்லுதல்
22. நொடித்தல் - கதை சொல்லுதல்
23. பகர்தல் - பண்டங்களைப் பகுத்து விலை சொல்லுதல்
24. பறைதல் - மறை (இரகசியம்) வெளிப்படுத்திச் சொல்லுதல்
25. பன்னுதல் - நிறுத்தி நிறுத்திச் சொல்லுதல்
26. பனுவுதல் - செய்யுளில் புகழ்ந்து சொல்லுதல்
27. புகலுதல் - விரும்பிச் சொல்லுதல்
28. புலம்புதல் - தனக்குத்தானே சொல்லுதல்
29. பேசுதல் - ஒருமொழியிற் சொல்லுதல்
30. பொழிதல் - இடைவிடாது சொல்லுதல்
31. மாறுதல் - உரையாட்டில் மாறிச் சொல்லுதல்
32. மிழற்றுதல் - மழலைபோல் இனிமையாகச் சொல்லுதல்
33. மொழிதல் - சொற்களைத் தெளிவாகப் பலுக்கிச் சொல்லுதல்
34. வலத்தல் - கேட்பார் மனத்தைப் பிணிக்கச் சொல்லுதல்
35. விடுதல் - மெல்ல வெளிவிட்டுச் சொல்லுதல்
36. விதத்தல் - சிறப்பாய் எடுத்துச் சொல்லுதல்
37. விள்ளுதல் - வெளிவிட்டுச் சொல்லுதல்
38. விளத்துதல் - (விவரித்துச்) சொல்லுதல்
39. விளம்புதல் - ஓர்அறிவிப்பைச் சொல்லுதல்
இணையத்தில் ஒரு இலக்கியப் படைப்பு! இது தமிழ் ஆர்வலர்களின் இலக்கியத் துடிப்பு!! ISSN: 2454-1990
அச்சிட
விமர்சிக்க
விருப்பத் தளமாக்க
