அருந்தலைவர் காமராசர் தமிழ கத்தின்
     ஆட்சியிலே முதல்வராக இருந்த போதோ
உருவத்தைப் போலன்றி உள்ளந் தன்னில்
     உள்ளவெள்ளை சட்டைதனை அணிந்த தன்மேல்
பெருமையுடன் துண்டுதனைப் போட்டி ருந்தார் !
     பெரும்பாலும் வலப்பக்கம் போடும் துண்டை
ஒருநாளோ இடப்பக்கம் போட்டுக் கொண்டே
     ஓரரசு விழாவிற்கு வந்தி ருந்தார் !

வழக்கமான தோற்றத்தில் இருந்தி டாமல்
     வலம்இடமாய்த் துண்டுமாறி இருக்கக் கண்டு
பழக்கமான செய்தித்தாள் நிருப ரெல்லாம்
     பணிவுடனே காரணத்தைக் கேட்டு நிற்கக்
குழந்தைமனம் கொண்டிருந்த காம ராசர்
     கூறவொரு காரணமும் இல்லை யப்பா !
பழசாகிப் போனதாலே கிழிந்த சட்டைப்
     பக்கத்தை மறைப்பதற்காய்ப் போட்டே னென்றார் !

கேட்டசெய்தி நிருபரெல்லாம் நெகிழ்ந்து நின்றே
     கேடுகெட்ட அரசியலில் இவரைப் போல
வேட்டிசட்டை கிழிந்தாலும் அணிந்து கொள்ளும்
     வேறுவொரு முதல்வர்தாம் உண்டோ என்றார் !
நான்ஏழைத் தலைவனென்றே உரைக ளாற்றி
     வீட்டுநலன் ஒன்றேதன் குறிக்கோ ளாக
வீதிவலம் வருபவரை எண்ணிப் பார்ப்பீர் !

இது முத்துக்கமலம் இணைய இதழின் படைப்பு.