காதலித்தால் குற்ற மென்று
     கழுத்தறுக்கும் கூட்ட மொன்று
சாதலினைத் தெருக்கள் ம்மில்
     சாதனையாய் நடத்து கின்றார் !

ஆதியிலே இல்லா ஒன்றை
     அடிமனத்துள் வளர்த்துக் கொண்டு
சாதிகளில் கீழ்மேல் ஆக்கிச்
     சரித்திரத்தை மாற்று கின்றார் !

குறுந்தொகையில் உள்ள மொன்றிக்
     குலவுகின்றார் காத லர்கள்
நறுந்தொகையாம் அகநா னூற்றில்
     நடக்கின்றார் கைகள் கோர்த்தே !

கலித்தொகையின் களவு தன்னில்
     களிக்கின்றார் காத லர்கள்
பலிகொடுத்த செய்தி யொன்றும்
     படிக்கவில்லை நாம வற்றுள் !

சாத்திரத்தைப் பார்த்த தாக
     சாதிவெறி இருந்த தாகப்
பாத்திறத்தில் புலவ ரன்று
     பதித்ததொரு குறிப்பு மில்லை !

சூத்திரமாய் யாரோ யின்று
     சூட்டிவிட்ட சாதி யாலே
ஆத்திரத்தில் தமிழர்க் குள்ளே
     அடிதடிகள் நடக்கு திங்கே !

தேர்தலுக்கு வேண்டு மென்று
     தேர்ந்தெடுத்தே ஊர்கள் தோறும்
சீர்கொடுத்துச் சாதி தன்னைச்
     சிறப்பாக வளர்க்கின் றார்கள் !

பெருந்தலைவர் ஆவ தற்கும்
     பெயர்தன்னைச் சொல்வ தற்கும்
உருவாக்கிச் சாதி தன்னை
     உருவேற்றி வளர்க்கின் றார்கள் !

கல்விக்குள் நுழைத்து விட்டார்
     கடன்பெறவும் விதித்து விட்டார்
நல்லரசுப் பணிக ளுக்கும்
     நடைமுறைவில் கொண்டு வந்தார் !

மதுக்கடையில் குடிகெ டுக்கும்
     மந்திரச்சொல் வைத்த போல
ஒதுக்கீடு தந்த வற்றுள்
     ஒட்டிவைத்தார் சாதி தன்னை !

முரண்களினை நீக்கு யென்று
     முழங்குவதால் நீங்கி டாது
சொரணையினை ஏற்று தற்குச்
     சொல்லுக்கும் வலிமை யில்லை !

சாட்டையிலே வடுக்க ளாக்கிச்
     சாற்றினால்தான் சாதி ஓடும்
வேட்டையினை நடத்தி னால்தான்
     வேண்டியநற் பொதுமை பூக்கும் !

இது முத்துக்கமலம் இணைய இதழின் படைப்பு.