நாட்டினிலே நடக்கின்ற அநியாயத்தை
     நான்கேட்கத் தெருவிற்கு வந்து நின்றால்
வீட்டினிலே இருப்பவர்கள் ஏசுகின்றார்
     வீண்வேலை எதற்கென்றே பேசுகின்றார் !
கூட்டிற்குள் அடைப்பட்டு இருத்தல்விட்டு
     குறைகேட்கச் சிறகுகளை விரியச் செய்தால்
மாட்டிற்குக் கிடைக்கின்ற சாட்டைபோல
     மரியாதை தானுனக்கும் கிடைக்குமென்றார் !

உண்மைகளைப் பேசுதற்கு வாய்திறந்தால்
     ஊர்கெட்டுக் கிடக்கிறது வாய்மூடென்றார்
கண்ணிரண்டில் பார்த்ததினைச் சொல்ல வந்தால்
     கழறுதற்கு நாக்குனக்கு இருக்காதென்றார் !
எண்ணத்தில் கபடின்றி நேர்மையோடு
     என்பணியைச் செய்வதனால் தலைநிமிர்ந்து
மண்மீது நடந்தாலோ காண்போரெல்லாம்
     மமதையோடு செல்வதினைப் பாரென்கின்றார் !

உழைக்காமல் உழைப்பவரின் உழைப்பைத் தின்னும்
     உன்மத்தர் செயல்களினைக் கேட்க வந்தால்
பிழைப்பதற்குத் தெரியாத முடடாள் என்றே
     பின்கழுத்தைப் பிடித்தென்னைத் தள்ளுகின்றார் !
குழைந்திரந்து வாழ்வதுவும் வாழ்வா சொல்வீர்
     குனிந்தபடி இருப்பதற்குத் தலையெதற்கு
பிழைகளினைச் சுட்டுதற்கே நிமிர்ந்து நிற்பேன்
     பின்விளைவு எதற்கும் நான் அஞ்சமாட்டேன் !

இது முத்துக்கமலம் இணைய இதழின் படைப்பு.