அண்ணனென்று தங்கையர்கள் அழைத்த போதும்
     அடியொற்றித் தம்பியர்கள் வந்த போதும்
கண்ணியமாய் முன்நிறுத்திப் பெற்றோர் எந்தக்
     காரியமும் எனைக்கேட்டுச் செய்த போதும்
வண்ணமயக் கனவுகளை நனவாய்ஆக்கும்
     வளர்சுமைகள் வருமென்று நினைத்திடாமல்
மண்மீதில் குடும்பத்து மூத்தோன் என்னும்
     மரியாதைப் பெருமையிலே மகிழ்ந்து போனேன் !

முதிர்கன்னி கோலத்தில் வீட்டிற்குள்ளே
     முகிழாதோ வாழ்வென்ற ஏக்கத்தோடு
குதிர்போல நின்றவளின் நெஞ்சத்தீயைக்
     குளிர்விக்கத் தங்கத்தை நீராய் ஊற்றி
நிதியளித்து முடிபோட்டுக் கரையைச் சேர்த்து
     நிமிர்தற்கு கரமூன்றி முயலுமுன்னே
குதித்தோடி தம்பி வந்தான் பட்டத்தோடு
     குதிரைக் கொம்பாம் பணிக்காய்க் குதிரையானேன் !

பரிந்துரைக்குப் பல்லிளித்துக் கையூட்டிற்குப்
     பணம்புரட்டி எலும்புடையப் பெற்றுத்தந்து
சிரிக்கின்ற நரைமுடியில் நிமிர்ந்து பார்த்தேன்
     சீர்கேட்டுக் குழந்தையுடன் தங்கை நின்றாள்
வரிசையாகத் தேவைகளைத் தீர்த்து வைத்து
     வாய்த்தசுமை தீர்ந்ததென்று முதுகைத் தூக்கிச்
சரியாக நிறுத்தி வைக்க முனைந்தபோது
     சலிப்போடு முதுமை வந்து புகுந்ததென்னுள் !

இது முத்துக்கமலம் இணைய இதழின் படைப்பு.