வரிசையிலே நின்றபடி வாக்க ளித்தே
     வணங்கிநின்ற தலைவரினைத் தேர்ந்தெ டுத்து
வரிசையிலே நின்றிடுவர் அவரின் வீட்டு
     வாசலிலே அவர்முகத்தைக் காண்ப தற்கே !
பெரிதாக விளம்பரந்தான் செய்து விட்டு
     பெயர்சூட்ட வருகின்ற அமைச்சர் தம்மை
வரிசையாக நின்றபடி பணிகள் விட்டே
     வரவேற்கக் காத்திருப்பர் சாலை யோரம் !

வயலினிலே விளைந்திட்ட விளைச்சல் தம்மை
     வாங்கிட்ட கடனுக்காய்த் தந்து விட்டே
அயலானைப் போல்அரசு கடையின் முன்பு
     அரிசிவாங்க நின்றிடுவர் வரிசை யாக !
கயமையினைத் தொழிலாகக் கொண்ட ஆட்சிக்
     கயவர்கள் தாம்கொழிக்க வஞ்ச கத்தால்
மயக்கிடவே திறந்திட்ட மதுக்க டையில்
     மயங்கிடவே நின்றிடுவர் வரிசை யாக !

பண்பாட்டைச் சீரழிக்கும் திரைப்ப டத்தைப்
     பார்ப்பதற்கு நின்றிடுவர் வரிசை யாக
கண்தெரியா தெய்வத்தைக் காண்ப தற்கும்
     காத்திருப்பர் வரிசையாக கோயில் முன்பு !
வண்ணமிகு வாழ்க்கையினைக் கெடுப்ப தற்கு
     வரிசையாக நின்றிருக்கும் எத்தர் தம்மைக்
கண்கண்டும் வரிசையாக செல்வ தன்றிக்
     கண்டிக்க மட்டுமிங்கே வரிசை யில்லை !

இது முத்துக்கமலம் இணைய இதழின் படைப்பு.